Ազգային ժողովում կառավարության ներկայացրած կենսաթոշակային պահումները չվճարելու դիմաց տուգանքների դադարեցման մասին օրինագծի քննարկման ժամանակ ՀԱԿ խմբակցության պատգամավոր Նիկոլ Փաշինյանը դիմեց ԱԺ ՀՀԿ-ական պատգամավոր Հակոբ Հակոբյանին՝ ցանկանալով ստանալ կոնկրետ պատասխան: Փաշինյանը նշեց, որ խոսում է շատ կոնկրետ խավերի մասին. պետական կառավարման համակարգում պետական աշխատողները, նախարարությունների, Ազգային ժողովի պատգամավորների օգնականներն էին այդ հարցով դիմել ամիսներ առաջ, երբ գրություն էին գրել, որ իրենցից գումար չպահվի:
«Հիմա էս իրավիճակը կարո՞ղ ենք կոնկրետացնել. ի վերջո, իսկապես, դուք Սահմանադրական դատարանին եք ասում, ՍԴ անդամը հինգ րոպե մի բան ա ասում, տասը րոպե՝ մի բան, հետո լրիվ ուրիշ բան ա պարզվում իրականում: Հիմա դուք բերել եք, դուք կարող է մի բան ասեք, նախարարը մի բան ասի, պատգամավորները քվեարկեն ուրիշ բանի մասին, հարկային տեսչությունն անի չորրորդ բան, հիմա էս ի՞նչ եք անում: Մարդկանց պետք է հստակ բացատրել, ես ասում եմ՝ աշխատողը գնաց, գործատուին ասաց՝ իմ փողը չփոխանցես, գործատուն էլ ասաց՝ փոխանցելու եմ, աշխատողը ի՞նչ անի»,- ասաց նա:
Փաշինյանը շեշտեց. ՍԴ որոշման մեջ ոչ մի տեղ չի նշված, որ գործատուի իրավունքները խախտվում են այս օրենքով, նշված է, որ աշխատողի, ֆիզիկական անձի իրավունքն են խախտում, որի աշխատավարձից առանց իրեն հարցնելու տանում են, ուստի իր հարցը շատ կոնկրետ է. ստացվում է՝ գործատուն կարող է ասել՝ այո, օրենք է, ես պահում եմ, ու քաղաքացին այս դեպքում ոչ մի բան չի կարող անել: «Քանի որ կոնկրետ օրինակի վրա բերեցինք, նախարարն էդ հարցին չպատասխանեց, պարոն Գալուստ Սահակյանը թող պատասխանի էդ հարցին. հիմա ԱԺ պատգամավորների օգնականներից էդ գումարները պահվելո՞ւ են էս օրենքի ընդունումից հետո, թե՞ ոչ: Հիմա կարելի՞ է ստանալ կոնկրետ հարցի պատասխան»,- ասաց նա:
Հակոբյանը նախ նշեց, որ կարծում էր՝ շատ պարզ է ասել՝ օրենքը կամավորության սկզբունք տվյալ դեպքում չի ճանաչում, և եթե կամավոր ինչ-որ մեկը ցանկանա մինչև սեպտեմբերի 30-ը ՍԴ պահանջները կատարել՝ շարժվել կամավորության սկզբունքով, սա հակաօրենսդրական է: «Պարզ չե՞մ ասում, ուզում եք ասեմ՝ պահի՞, թե՞ չպահի: Է՞դ եք ուզում: Հստակ ասեմ՝ կա 8-րդ հոդված օրենքի, որը ճանաչված չէ հակասահմանադրական և այս պահին գործում է»,- ասաց նա:
ԱԺ նորընտիր նախագահն էլ տեղից արձագանքեց. «Գալուստ Սահակյանն օրենքով կվերաբերվի»:
Լուսանկարը՝ Photolure-ի
