ԱԺ «Ժառանգություն» խմբակցության ղեկավար Ստյոպա Սաֆարյանը «Առաջին լրատվականի» հետ զրույցում անդրադարձավ ոստիկանապետ Ալիկ Սարգսյանի հայտարարություններին, թե ինքը «սիմպատիա» չունի հեղափոխությունների հանդեպ և թույլ չի տա ՀՀ-ում հեղափոխություն:
«Այդ հայտարարությունները ևս մեկ անգամ ապացուցեցին, որ ՀՀ ոստիկանապետն իր տեղում չէ: ՀՀ-ն այսօր չունի ոստիկանապետ, այլ ունի հեղափոխությունների հանդեպ «սիմպատիա» չունեցող և քաղաքականությանն ակտիվորեն մասնակցող մեկին, որին երբեք ոստիկանապետ չես համարի, քանի որ նրա գործողությունները հակասում են «Ոստիկանության մասին» օրենքին»,- հայտարարեց Ստյոպա Սաֆարյանը:
Նա ուշադրություն հրավիրեց Ալիկ Սարգսյանի մեկ այլ հայտարարության վրա, ըստ որի` ոստիկաններին չի կարելի դարձնել քավության նոխազ:
«Նա բացահայտ հայտարարեց, որ ոստիկաններն ինքնուրույն չեն գործել, այլ հրաման են կատարել: Այսինքն` նա այդպես հաստատել է, որ ոստիկաններին անօրինական հրաման տվել են շատ ավելի բարձր տեղից, և եթե պետք է պատժվի որևէ մեկը, ապա դա ոստիկան չպետք է լինի, այլ ավելի բարձր մեկը, որ հրամանը տվել է»,- մեկնաբանեց Սաֆարյանը: