Ազգային ժողովի ՕԵԿ խմբակցության պատգամավոր Հովհաննես Մարգարյանն ԱԺ հայտարարությունների ժամին առաջին անգամ իբրև ընդդիմադիր հանդես գալով՝ նշեց, որ իրենց համար օրակարգային է լինելու սնկի պես աճող անարդարությունների դեմ պայքարը։
Մարգարյանը խոսեց ամեն օր փակվող փոքր ու միջին խանութներից, օրենցօր աճող սուպերմարկետներից, որոնք էլ պատճառ են դառնում փոքր ու միջին խանութների փակման, ինչի արդյունքում աշխատատեղերը ոչ թե ավելանում են, այլ պակասում՝ պատճառ դառալով արտագաղթի ծավալների ավելացմանը։
«Մենք անընդունելի ենք համարում մեծահարուստներին շքեղության հարկից ազատելու գաղափարախոսությունը, ավելին, շքեղ, 25 մլն դրամից ավել արժողությամբ մեքենաներ ունեցողները շքեղության հարկ պետք է վճարեն ոչ միայն մեքենաների, այլև իրենց շքեղ առանձնատների և թանկարժեք վիլլաների համար: Ինչպես ասում են՝ մատների վրա հաշված «Ավետ աղաները», ի տարբերություն շարքային քաղաքացիների, պետք է ավելի շատ հարկեր վճարեն՝ ճոխ ու շքեղ ապրելու համար, իսկ որոշ անկուշտների համար ժամանակն է ընդունել կշտանալու մասին օրենք»,-ասաց նա:
Մարգարյանն անդրադարձավ նաև ՕԵԿ հասցեին հանիրավի հնչող քննադատություններին, ապա ցանկացավ ևս մեկ անգամ փաստել, որ իրենց համար առավել կարևոր է ժողովրդի գնահատականը։
ՕԵԿ պատգամավորի խոսքով՝ ժողովուրդն է ամենաիմաստունը, իսկ ժամանակը արդար դատավոր է։ «Երկիրը փոքր է, բոլորը բոլորին լավ ճանաչում են, և ինչքան էլ հանդես գան ոմանք որպես աղավնի և իրենց բերնում դնեն ձիթենու պտուղ, միևնույնն է՝ տեսանելի է, որ բորենին երբեք աղավնի չի դառնում»,- ասաց նա։
