Հայաստանի Հանրապետության աշխատանքի և սոցիալական հարցերի նախարար Արտեմ Ասատրյանն ապրիլի 29-ին խորհրդարանին ներկայացրեց Պետական կենսաթոշակների մասին օրենքում փոփոխություններ ու լրացումներ կատարելու մասին օրենքի նոր նախագիծ: Նա նշեց, որ իրենք առաջին քայլն են անում, բաց են բոլոր շահագրգիռ կողմերի հետ քնարկումների համար:
ԱԺ պատգամավոր Խաչատուր Քոքոբելյանը հետաքրքրվեց՝ արդեն իսկ պահված գումարների վերադարձ տեղի՞ է ունենալու թե ոչ, և վերջապես պարտադիր բաղադրիչը պե՞տք է կասեցվի, քանի որ հիմա պարտադիր բաղադրիչը չի համարվում պարտադիր: «Օրենքը չի կարող գործել տեղ-տեղ»,- ասաց նա:
Ասատրյանն անդրադարձավ հարցադրումներին, որոնք կապված են վճարների վերադարձի և ընդհանրապես այն իրավիճակի հետ, որն առաջացել է տվյալ դեպքում Սահմանադրական դատարանի նախ՝ աշխատակարգային, ապա ապրիլի 2-ի որոշման արդյունքում: «Աշխատանքային որոշմամբ կասեցվեց 76-րդ հոդվածը:
Ըստ էության՝ պատասխանատվության նորմը պարունակող հոդվածը դադարել է գործել մինչև ապրիլի երկուսը, այդ ժամանակահատվածում վճարներ կատարվել են, կարելի է ասել, փոխադարձ համաձայնությամբ: Ներկայում կան 127 հազար քաղաքացիներ, ում համար կատարվել են վճարումներ, ովքեր ընտրել են ֆոնդեր: ՍԴ որոշման մեջ ևս կան իրարամերժ կարծիքներ. դրանք ձևավորեցին իրավիճակ, որտեղ նորից կան տարբեր դիրքորոշումներ»,- ասաց նա՝ հավելելով, որ Կառավարության քայլը հետևյալն է՝ ձևավորել իրավիճակ, որը թույլ կտա մինչև ամբողջական փաթեթի ընդունումը (որ ամբողջական պատասխան կտա հարցերին), իրերi դրությունը թողնել այնպես, ինչպես կա:
Նախարարի խոսքով՝ Կառավարությունը, նաև անսալով հասարակության որոշ շերտերի ներկայացուցիչների կարծիքին, քայլ է անում, որը թույլ կտա բոլոր կողմերի հետ համապատասխան քննարկումների արդյունքում գտնել նաև նշված հարցերի պատասխանները:
Ըստ Ասատրյանի՝ այդ գումարները, որոնք վճարվել են, մասնակիցների՝ աշխատողների հաշիվներին են, իրենց սեփականությունն են, նաև լրացուցիչ եկամուտ են բերում նրանց: «Վարչապետն, ամեն դեպքում, հակված է, որ հնարավորինս կարճ ժամկետում կարողանանք գտնել լուծումներն այն բոլոր հարցադրումների, որ կան, ունենան հստակ թեկնածուներ: Աշխատանքը քննարկումներ է պահանջում, որ չունենանք լուծումներ, որոնք հարցադրումներ են առաջացնում: Այս առումով մեզ անհրաժեշտ է ձեր աջակցությունը»,- ասաց նա:
