Ռուսաստանի կողմից ղեկավարվող Մաքսային միությանն անդամակցելու Հայաստանի հանձնառությունից հետո բազմիցս հնչել են կարծիքներ, թե Հայաստանը կարող է ունենալ երեքուկես տարի ԵՄ-ի հետ բանակցած Ասոցացման համաձայնագրի քաղաքական հատվածը մեկ այլ փաստաթղթի ներքո: Այս մասին առաջին անգամ խոսեց ՀՀ-ում Լեհաստանի դեսպան Զդիսլավ Ռաչինսկին, ապա փորձագետներ ու քաղաքական որոշ գործիչներ: Օրերս Երևանում գտնվող Եվրոպական խորհրդարանի պատգամավոր Ֆրանկ Էնգելը ևս ասել էր, թե չկա որևէ խոչընդոտ Հայաստանի՝ Ասոցացման համաձայնագրի քաղաքական բաղադրիչի նախաստորագրման-ստորագրման ճանապարհին, սրա հնարավորության մասին խոսել է նաև Հայաստանի Եվրոպացի բարեկամներ կազմակերպության ղեկավար Էդուարդո Օչոան: Ասոցացման համաձայնագրի քաղաքական բաղադրիչի ստորագրման ջատագովների թվում է նաև ՀՀ-ում Գերմանիայի դեսպան Ռայներ Մորելն, ով լրատվամիջոցներից մեկի հետ զրույցում ասել է, որ Հայաստանը դեռևս կարող է Եվրամիության հետ ստորագրել Ասոցացման համաձայնագրի քաղաքական մասը` նույնիսկ Մաքսային միություն մուտք գործելուց հետո պարզապես միգուցե այլ անվան ներքո:
«Բրյուսելը պատրաստ է առաջ հարաբերությունները Հայաստանի հետ՝ կառուցելով այն ամենի վրա, որին հասել է մինչ այժմ»:
«Առաջին լրատվական»-ը ԵՄ ընդլայնման և եվրոպական հարեւանության հարցերով հանձնակատար Շտեֆան Ֆյուլեի խոսնակ Պիտեր Ստանոյից հետաքրքրվեց՝ արդյո՞ք նման որևէ ուրվագիծ կա այսօր ՀՀ-ԵՄ հարաբերությունների օրակարգում և ինչ համաձայնագրի մասին է խոսքը: Չանդրադառնալով որևէ դիվանագետի առանձին կարծիքի՝ Ստանոն նշեց, որ ներկայումս ընթանում են ՀՀ-ԵՄ հետագա հարաբերությունների շրջանակի հստակեցման աշխատանքները՝ նախորդ տարվա նոյեմբերին Արևելյան գործընկերության վիլնյուսյան գագաթնաժողովի ժամանակ կողմերը համաձայնել են երկու կողմերի համար հետաքրքրություն վայելող բոլոր ոլորտներում առկա համագործակցությունը զարգացնել և ուժեղացնել: «Չնայած չենք կարող շարունակել Ասոցացման համաձայնագիրն ու Խորը և համապարփակ ազատ առևտրի գոտու պայմանագիրը, մենք պատրաստ ենք առաջ մղել մեր հարաբերությունները Հայաստանի հետ՝ կառուցելով այն ամենի վրա, որին հասել ենք մինչ այս»,- հստակեցրեց նա՝ հիշեցնելով, որ ներկայիս ԱՀ/ԽՀԱԱԳ-ն հնարավոր չէ ստորագրել Հայաստանի հետ ՄՄ-ին միանալու հանձնառության պատճառով: Ըստ նրա՝ հակառակը կնշանակեր պարտավորությունների անհամապատասխանություն երկու հանձնառությունների պարագայում:
«ԵՄ-ն պատրաստ է Հայաստանի հետ շարունակել ոչ միայն հարաբերությունների քաղաքական մասն, այլև երկկողմ առևտրային հարաբերությունները՝ հիմնված այն ամենի վրա, ինչին մենք հասել ենք բանակցությունների ընթացքում»:
«Հայաստանի պարագայում Ասոցացման համաձայնագիրն ու Խորը և համապարփակ ազատ առևտրի գոտու պայմանագիրը բանակցվել են որպես մեկ միասնական իրավական գործիք: Հայաստանի ՄՄ-ին միանալու որոշումը ենթադրում է, որ Ասոցացման համաձայնագրի ԽՀԱԱԳ մասը չի կարող գործարկվել: Սա իր հերթին նշանակում է, որ իրավական մեկ միասնական փաստաթուղթն այլևս չի կարող ստորագրվել կամ նախաստորագրվել: Այնուամենայնիվ, ԵՄ-ն պատրաստ է շարունակել ոչ միայն հարաբերությունների քաղաքական մասն, այլև երկկողմ առևտրային հարաբերությունները՝ հիմնված այն ամենի վրա, ինչին մենք հասել ենք բանակցությունների ընթացքում: Միևնույն ժամանակ պատրաստ ենք հարմարեցնել մեր ապագա համագործակցությունը Հայաստանի արտաքին քաղաքական հանձնառությունների և ՄՄ անդամակցությունից բխող Հայաստանի պարտավորություններին»,- ասաց նա:
