Այսօր` ժամը 18:40-ի սահմաններում, 40-50 տարեկան մի տղամարդ բարձրացել էր «Հաղթանակ» կամրջի բազրիքին և ցանկանում էր ինքնասպան լինել:
Ինչպես հաղորդում է ֆոտոլրագրող Գագիկ Շամշյանը, հավաքվել էին մեծ թվով քաղաքացիներ: Ահազանգով շուտով տեղ ժամանեց նաև Ոստիկանության կենտրոնական բաժնի օպերատիվ-քննչական խումբը:
Մոտ 20 րոպե տևեցին ոստիկանների և ինքնասպանության փորձ կատարող տղամարդու միջև բանակցությունները: Ոստիկանները փորձում էին համոզել տղամարդուն, որ նա չկատարի այդ քայլը: Պատրվակ բռնելով այն, որ ուզում են տղամարդուց անձամբ վերցնել իր ներկայացրած պահանջները, ոստիկանները մոտեցան նրան և կարողացան նրա մարմինը բռնել` դրանով կանխելով նրա ինքնասպանությունը:
Տղամարդն այժմ գտնվում է Ոստիկանության կենտրոնական բաժնում: Թեև շտապբուժօգնության աշխատակիցները արդեն ժամանել են և զրուցում են նրա հետ, այդուհանդերձ, նա ոչ մի հարցի չի պատասխանում և դեռևս անհայտ է նրա ինքնությունը:
Հավելենք, որ այսօր առավոտյան մի երիտասարդ տղա, կամրջից նետվելով, ինքնասպանություն էր գործել: Պարզվել է այդ երիտասարդի ինքնությունը: Նա Երևան քաղաքի Մամիկոնյանց փողոցի բնակիչ Միքայել Լևոնի Վասիլյանն էր: