ԱՄՆ զինված ուժերը ստացել են Ֆիլիպիններում ռազմական օբյեկտները 10 տարի կիրառելու իրավունք, սակայն չեն կարող այնտեղ փոխադրել միջուկային զենք: Նման դրույթներ են պարունակվում երկու երկրների միջև պաշտպանական համագործակցության մասին նոր համաձայնագրում, որը ստորագրվել է այսօր՝ Մանիլայում:
Այն կնքվել է Մանիլայում ԱՄՆ նախագահ Բարաք Օբամայի սկսվող պաշտոնական այցի շրջանակում՝ փոխանցում է ITAR-TASS-ը:
Նոր պայմանագիրը, որը նախատեսում է 10 տարուց հետո երկարացման հնարավորություն, ուղի է բացում Ֆիլիպիններում ամերիկյան ռազմական ներկայության վերականգնման համար: Երկրից ԱՄՆ զինված ուժերը լիովին դուրս էին բերվել 1992-ի ժողովրդական հեղափոխությունից հետո, որի արդյունքում տապալվեց բռնապետ Ֆերդինանդ Մարկոսի ամերիկամետ ռեժիմը: Ներկայիս փաստաթուղթը կրում է ընդհանրական բնույթ, քանի որ ԱՄՆ զորքերի տեղակայման պայմանները, բնույթն ու մասշտաբները պետք է որոշվեն հետագա խորհրդակցությունների ընթացքում:
Վերջին շրջանում Վաշինգտոնի և Մանիլայի պաշտպանական կապերն ընդլայնվել են հակամարտության ֆոնին, որը Ֆիլիպիններն ունի Չինաստանի հետ Հարավչինական ծովի վիճելի շրջանների առնչությամբ:
