Կալիֆոռնիա նահանգի բարերից մեկում հայտնաբերվել է հեռախոս, որը, ենթադրաբար, Google և LG ընկերությունների համատեղ սմարթֆոնի՝ Nexus 4-ի նախատիպն է: Սարքը հայտնաբերած մարդիկ այն վերադարձրել են Google-ին:
Ապարատը հայտնաբերել է Սան Ֆրանցիսկոյի 500 Club հաստատության բարմենը: Դա տեղի է ունեցել սեպտեմբերի երկրորդ կեսին: Բարմենը զարմացել է, որ հեռախոսը ամբողջ օրը մնացել է դրամարկղի մոտ, սակայն դրա ետևից ոչ ոք չի եկել: Նա ուսումնասիրել է սարքը, փորձել գտնել սեփականատիրոջ կոնտակտները, սակայն սարքն արգելափակված է եղել, բացի այդ` հեռախոսը չի ունեցել SIM-քարտ:
Բարմենը նկատել է սմարթֆոնի վրա զետեղված Google-ի և LG-ի տարբերանշանները, իսկ վերջին պանելին գրված է եղել՝ «Նախատեսված չէ վաճառքի համար»:
Բարմենը խորհրդակցել է բարի մշտական հաճախորդի հետ, որը լավ է հասկանում բջջային էլեկտրոնիկայից: Նա ճանաչել է. սարքը դեռևս պաշտոնապես չներկայացված Nexus 4 սմարթֆոնն էր, ինչից հետո կապվել է Google-ի կենտրոնակայանի հետ և հաղորդել սմարթֆոնի նախատիպի հայտնաբերման մասին:
Google-ը բարմենին անվճար հեռախոս է առաջարկել՝ կորած բջջայինի մասին պատմությունը գաղտնի պահելու համար, սակայն բարմենը չի համաձայնել և պարգևատրվել է Wired հրատարակությունից՝ իր արած լուսանկարների հրապարակման համար:
Նոր սմարթֆոնը պետք է ներկայացվեր այսօր, սակայն մրրիկի պատճառով միջոցառումը հետաձգվել է:
