Քիչ առաջ մենք կապվեցինք Ճապոնիայում Հայաստանի Հանրապետության դեսպանության առաջին քարտուղար Արսեն Առաքելյանի հետ` խնդրելով ներկայացնել իրավիճակը «ծագող արևի» երկրում և տեղեկացնել, թե արդյոք Հայաստանի Հանրապետության քաղաքացիների շրջանում տուժածներ չկա՞ն:
– Պարոն Առաքելյան, խնդրում ենք ներկայացրեք, ի՞նչ իրավիճակ է այս պահին Ճապոնիայում և մայրաքաղաք Տոկիոյում:
– Երեկ` մարտի 11-ին, ժ. 14:30-15:00-ի ժամանակահատվածում Ճապոնիայի Հոնսյու կղզու հյուսիսային Սենդայ քաղաքի շրջակայքում 8.8-բալանի երկրաշարժ է գրանցվել: Տոկիոյում այն չի գերազանցել 7.5 բալ: Կան որոշ ավերածություններ մայրաքաղաքում: Հիմա իրավիճակը կարծես կայունանում է, թեպետ անընդհատ ուժեղ ցնցումներ են գրանցվում: Երկրաշարժը տևել է մի քանի րոպե, և համարվում է վերջին հարյուր տարում ամենաերկարատևն ու հզորը:
– Ձեր տեղեկություններով, Հայաստանի քանի՞ քաղաքացի կա Ճապոնիայում և արդյո՞ք Դուք կապ եք պահպանում նրանց հետ:
– Ճապոնիայում են այս պահին Հայաստանի Հանրապետության 30 քաղաքացիներ: Նրանք բոլորն էլ գտնվում են էպիկենտրոնից հեռու: Դուք գիտեք, որ երեկ երկրաշարժից հետո ընդհատվել է հեռախոսակապը, սակայն էլեկտրոնային հնարավոր միջոցներով ՀՀ ներկայացուցչությունը կապ է հաստատել նրանցից մեծ մասի հետ:
– Այսինքն` Ձեր տեղեկություններով, այս պահի դրությամբ ՀՀ տուժած քաղաքացիներ չկա՞ն:
– Ո՛չ…
Հենց այդ պահին Արսեն Առաքելյանը խնդրեց ընդհատել կապը, քանի որ Տոկիոյում սկսվեցին հերթական ուժեղ ցնցումները:
