Թուրքական TRT Haber հեռուստաալիքի փոխանցմամբ` Թուրքիայի զինված ուժերի Գլխավոր շտաբը հերքել է, որ սիրիական զարգացումների հետ կապված` ամերիկյան զինվորական կոնտինգենտ է ուղարկվել Թուրքիա: Այս մասին նշված է Գլխավոր շտաբի ինտերնետային կայքում:
Դրանում հիշեցվում էր, որ Թուրքիայում հիրավի գտնվում են ամերիկյան զինծառայողներ, ինչը, սակայն, որևէ կապ չունի թուրք-սիրիական սահմանային վերջին զարգացումների հետ: Իր հայտարարությունում Գլխավոր շտաբը հիշեցնում էր, որ Թուրքիայում ամերիկյան զինծառայողները գտնվում են Ինջիրլիքի բազայում` համաձայն 1980 թվականի դեկտեմբերի 11-ին երկու երկրների միջև կնքված Պաշտպանական ու տնտեսական համագործակցության պայմանագրի և Մալաթիայի նահանգի Քյուրեջիք վայրում` համաձայն 2011 թվականի սեպտեմբերի 14-ին Թուրքիայում ամերիկյան (ՆԱՏՕ) ռադարի տեղակայման վերաբերյալ ստորագրված հուշագրի:
Հիշեցնենք, որ երեկ ԱՄՆ շտաբների պետերի միացյալ կոմիտեի նախագահ, գեներալ Մարտին Դեմփսին Պենտագոնում կազմակերպված մամլո ասուլիսի ժամանակ հերքել էր Եվրոպայում ամերիկյան զորքերի հրամանատար, գեներալ-լեյտենանտ Մարկ Հերթլինգի այն հայտարարությունը, թե ԱՄՆ-ը զինվորական կոնտինգենտ է ուղարկել Թուրքիա՝ կապված սիրիական զարգացումների հետ: