ՀՀ կառավարության քաղաքային հեռախոսահամարները օգոստոսի վերջից մինչև այս ամսվա սկիզբն անջատված մնալուց հետո` վերջապես սկսեցին գործել: Կառավարությունից «Հայկական ժամանակ»-ի թղթակցին տրված գրավոր պատասխանի համաձայն` ներքին հեռախոսակապն ամբողջությամբ վերազինվել է, քանի ոի հինը ֆիզիկապես մաշված էր, և վերջին խափանումից հետո այլևս անհնար է եղել վերականգնել:
«Հեռախոսակապի ամբողջական վերազինման համար` Համաշխարհային բանկի հատկացված միջոցներից ծախսվել է 24 միլիոն 540 հազար դրամ»,- նշված է կառավարության պատասխանում:
Այսինքն` շնորհակալություն ՀԲ-ին, որ ՀՀ կառավարությանը չի թողել առանց հեռախոսակապի: Ի դեպ, հեռախոսակայանի վրա ծախսված գումարի չափի և աղբյուրի մասին հարցմանը կառավարությունից մեծ դժվարությամբ, մի տեսակ չուզենալով են պատասխանել: Երևի չէին ուզում, որ հանրությունն իմանա, թե ինչ ծանր կացության մեջ է հայտնվել ՀՀ կառավարությունը, որն այլևս ի վիճակի չէ սեփական միջոցներով սեփական հեռախոսի հարցը լուծել և դրա համար 24 միլիոն դրամ չի ունեցել:
