«ԱրմենՏել» ընկերությունը (ապրանքանիշը Beeline), էքստրեմալ սպորտի «Ադրենալին» ասոցիացիան և STR սպորտային ակումբը հայտարարում են «BeeCross 2012» հանրապետական ավտոքրոսի մրցույթի անցկացման մասին: Մրցույթը տեղի կունենա Երևանի Նուբարաշենի հրաձգարանի տարածքում հատուկ պատրաստված օղակաձև մայրուղիով: 2012թ-ի hոկտեմբերի 28-ին կայանալիք «BeeCross 2012» մրցույթին կմասնակցեն ավտոմեքենաներ և քառացիկլեր:
Վարորդները կմրցեն օլիմպիական համակարգով` կատարելով 3-ական ամբողջական պտույտ ամեն մրցաերթում: Մրցուղու երկարությունը 1.3 կմ է: Քառացիկլերի դասում կտրվի միասնական մեկնարկ` 15 ամբողջական պտույտով:
«Օղակաձև մայրուղիով անցկացվող ավտոքրոս դասի մրցումները կարելի է համարել առավել դիտարժան ավտոսպորտում: Հանդիսատեսը կարող է հեշտությամբ հետևել, թե ինչպես են մասնակիցները հաղթահարում տարբեր խոչընդոտներ` փոսեր, հատուկ հարթակներ և դժվարանցանելի հատվածներ: Վստահ եմ, որ Հայաստանում երիտասարդական սպորտի աջակցմանն ուղղված ընկերության հերթական նախաձեռնությունը ոչ միայն կարժանանա մրցույթի հին սիրահարների ուշադրությանն, այլև կգրավի առաջին անգամ մրցույթին այցելած մարդկանց սրտերը», – նշեց «ԱրմենՏել» ՓԲԸ Գլխավոր տնօրեն Իգոր Կլիմկոն:
«Ավտոքրոս մրցաձևը համարվում է ամենատեսարժաններից ավտոսպորտում. չնայած այդ հանգամանքին այս կարգի մրցումներ մեր երկրում վաղուց չեն իրականացվել: Էքստրեմալ սպորտի «Ադրենալին» ասոցիացիայի, STR սպորտային ակումբի ջանքերի և մեր հովանավորների շնորհիվ մենք երկարատև դադարից հետո վերսկսում ենք ավտոքրոսսի մրցումները», – նշեց Էքստրեմալ սպորտի «Ադրենալին» ասոցիացիայի նախագահ Արտաշես Ստեփանյանը:
Միջոցառումը կսկսվի կեսօրին, հանդիսատեսների մուտքն անվճար է: Ավտոքրոսին կարող են մասնակցել բոլոր ցանկացողները: Մասնակիցներից պահանջվում է սպորտային ամրագոտիներ և անվտանգության կարկաս ունեցող ավտոմեքենա: Քառացիկլերի դասում մրցողը պետք է ունենա հատուկ սաղավարտ և կոշիկներ: Մասնակիցների գրանցումը կատարվում է մինչև հոկտեմբերի 27-ը` էքստրեմալ սպորտի «Ադրենալին» ասոցիացիայի 010-22-80-85 հեռախոսահամարով:
