2013թ. հունվարին Դանիայի Թագավորական թատրոնում կբեմադրվի 2011թ. մահացած անգլիացի ռետրո-սոուլ երգչուհի Էմի Ուայնհաուսի կյանքի մասին ներկայացում: Այս մասին հայտնում է The Daily Telegraph-ը՝ հղում կատարելով թատրոնի հայտարարությանը:
Amy խորագրով ներկայացումը համաշխարհային հռչակ վայելող Ուայնհաուսի ստեղծագործական ուղու մասին է, ինչպես նաև` անձնական կյանքում նրա ունեցած խնդիրների, թմրանյութերի չարաշահման ու ալկոհոլի նկատմամբ ունեցած թուլության մասին:
Պիեսը, որի հիման վրա կբեմադրվի ներկայացումը, գրվել է 11 հեղինակների մասնակցությամբ դանիերենով ու կրում է «Կարմիր սենյակ» անվանումը: Պիեսի հիմքում երգչուհու հարցազրույցներն են, թերթերի գրառումները, նյութեր` համերգային ելույթներից, նրա նամակներն ու Frank և Back to Black ձայնասկավառակների երգերը:
Ներկայացման պրեմիերան նախատեսված է հունվարի 30-ին: Դեռ հայտնի չէ, թե ով է ներկայացման ռեժիսորը:
Ուայնհաուսը մահացել է Լոնդոնի իր բնակարանում` 2011թ. հուլիսի 23-ին, 27 տարեկանում, ալկոհոլային թունավորումից:
