Վրացական apsny.ge լրատվական գործակալության հաղորդմամբ, մարտի 9-10-ին Շվեյցարիայի մայրաքաղաք Բեռնում Առևտրի համաշխարհային կազմակերպությանը (ԱՀԿ) Ռուսաստանի անդամակցության շուրջ Վրաստանի և Ռուսաստանի միջև կայացած բանակցություններն անարդյունք են ավարտվել: Կողմերը միայն համաձայնության են եկել երկու ամիս անց բանակցությունները վերսկսելու շուրջ:
Վրաստանի արտգործնախարարության պաշտոնական ներկայացուցիչ Սերգի Կապանաձեն հայտարարել է, որ տվյալ հարցում Վրաստանի դիրքորոշումը շարունակում է մնալ անփոփոխ. Վրաստանը պահանջում է միջազգային դիտորդների մասնակցությամբ թափանցիկ ռեժիմ հաստատել Պսոու գետի և Ռոկյան թունելի սահմանային-մաքսային անցակետերում, սակայն Ռուսաստանը մերժում է դա` նշելով, որ այդ հարցով Վրաստանը պետք է դիմի ոչ թե իրեն, այլ Աբխազիային և Հարավային Օսիային:
Նշվում է, որ բեռնյան բանակացությունները նախաձեռնել է ռուսական կողմը: Դրանցում Վրաստանը ներկայացրել է տնտեսական հարցերով վարչապետի խորհրդատու Թամար Կովզիրիձեն, իսկ Ռուսաստանը ներկայացրել է ԱՀԿ-ին Ռուսաստանի անդամակցության գծով գլխավոր բանագնաց Մաքսիմ Մեդվեդկովը:
Հիշեցնենք, որ ներկայիս դրությամբ ԱՀԿ-ի անդամ են 153 երկրներ, այդ թվում՝ Հայաստանը (05.02.2003):