Չորեքշաբթի օրը ՄԱԿ-ն իր շտաբ-բնակարանում հանդիսավոր համերգով նշել է իր 67-ամյակը: Բեմ է բարձրացել լեգենդար Սթիվի Ուանդերը, որը կատարել է բոլորի կողմից սիրված երգեր` հերթով բեմ հրավիրելով իր ընկերներին` Սթինգին, Փոլ Սայմոնին, Ալիշա Քիզին, Քեյշա Քոուլին և այլ աստղերի:
«Այսօր նա մեզ նվեր է մատուցում` անմոռանալի համերգ ՄԱԿ-ի պատվին, ՄԱԿ-ի, որը պատերազմներ է կանգնեցնում, խթանում է խաղաղության հաստատումը, որը պայքարում է մարդու իրավունքների համար և փորձում է վերջ տալ հիվանդություններին ու տառապանքներին»,- ասել է ՄԱԿ-ի գլխավոր քարտուղար Պան Գի Մունը:
Սթիվի Ուանդերն ասել է. «Այսօր ես իմ մասին գաղտնիք կբացեմ: Դուք պատրա՞ստ եք լսել այն: Ես կույր եմ»: Ի ծնե կույր երաժիշտը խոսել է միջազգային խաղաղության և անվտանգության գործում ՄԱԿ-ի դերի, այդ նպատակի համար պայքարելու անհրաժեշտության մասին:
Սթիվին ասել է. «Ես հավատում եմ, որ խաղաղությունը պատերազմի բացակայությունը չէ: Խաղաղությունն այն է, ինչ մենք ամեն օր քայլ առ քայլ ստեղծում ենք: Երբեմն մենք ստիպված ենք լինում շատ աշխատել` սիրո, ոչ թե պատերազմի ձգտելու համար: Սա պատճառներից մեկն է, թե ինչու եմ ես երաժշտություն գրում: Եվ սա ինձ դուր է գալիս»:
Կես ժամում Սթիվին կատարել է իր հիթերից 10-ից ավելին, որոնց թվում են եղել` You Can Feel It All Over-ը, Higher Ground-ը, I Just Called To Say I Love You-ն և There Is Superstition-ը: Սթիվին Սթինգի հետ կատարել է Fragile երգը:
ՄԱԿ-ը հիմնադրվել է 1945-ին, դրա կազմում ընդգրկվել են Մեծ Բրիտանիան, Չինաստանը, Խորհրդային միությունը, ԱՄՆ-ը, Ֆրանսիան և այլ երկրներ:
