ՈւԵՖԱ-ի նախագահ Միշել Պլատինին մարզադաշտերում ռասիզմի դրսևորումներն անվանել է ժամանակակից ֆուտբոլի կարևորագույն խնդիրներից մեկը: Պլատինին չի բացառել նաև, որ սերբական ազգային ֆեդերացիան կարող է պատժվել Անգլիայի երիտասարդական ընտրանու դեմ կայացած հանդիպումից հետո տեղի ունեցած միջադեպի համար:
«Մենք մեր կազմակերպության անդամներին տարիներ շարունակ օգնում ենք պայքարել ռասիզմի դեմ, և այդ օգնությունն ունի նաև ֆինանսական բնույթ: Մենք կանենք հնարավոր ամեն ինչ ռասիզմը մարզադաշտերից արմատախիլ անելու համար: Ինչ վերաբերում է Սերբիա – Անգլիա հանդիպման ժամանակ տեղի ունեցած միջադեպին, ապա մեր կարգապահական խորհուրդը կզբաղվի այդ հարցով: Չնայած մեղադրանքներ են ներկայացված երկու երկրների ֆեդերացիաներին` մենք մեկ տարի առաջ զգուշացրել ենք ՍՖՖ-ին և այժմ պատիժը կարող է գերազանցել հասարակ տուգանքը»,- հայտարարել է Պլատինին:
Հիշեցնենք, որ հանդիպման ընթացքում սերբ երկրպագուները վիրավորում էին Անգլիայի ընտրանու սևամորթ խաղացողներին, ինչի արդյունքում կիսապաշտպան Դենի Ռոուզը զայրանալով` գնդակը նետել է դեպի տրիբունա: Մրցավարի եզրափակիչ սուլիչից հետո ծեծկռտուք է սկսվել:
