Առողջապահության նոր նախարար, ՀՀԿ ԳՄ անդամ Դերենիկ Դումանյանը կառավարության հայտնի նիստից հետո, երբ Սերժ Սարգսյանը ոլորտում տիրող իրավիճակը «խայտառակ» որակեց, այդպես էլ չարտահայտվեց` համաձա՞յն է Սերժ Սարգսյանի գնահատականի հետ, թե՞ ոչ: Հայտնի է միայն, որ այդ հայտարարությունից հետո ստուգումներ իրականացվեցին առողջապահության ոլորտում, և չեն դադարում խոսակցությունները, թե հնարավոր է քրեական գործեր հարուցվեն նախկին ԲՀԿ-ական նախարարությունում:
Շաբաթ օրը Դերենիկ Դումանյանը մասնակցում էր Աղվերանում լրագրողների համար կազմակերպված սեմինարին, ուստի նրանից հետաքրքրվեցինք, թե, ի վերջո, համաձա՞յն էր Սերժ Սարգսյանի գնահատականի հետ, որը առողջապահության ոլորտում իրավիճակը խայտառակ որակեց: «Հիմնական միտքը այդ ձևակերպման այն էր, որ մեր ազգաբնակչության զգալի մասը` շուրջ 1/3-ը, դժգոհ է առողջապահական համակարգից: Դժգոհությունները գալիս են` սկսած վերաբերմունքից բուժհիմնարկներում, մինչև ֆինանսական, դեղորայքային, սպասարկման, բժշկական որակի հետ կապված հարցերից: Բժիշկ-հիվանդ հարաբերություներում ինչ-որ մի բան խախտվել է: Դժգոհություններ, այո՜, կան»,- ի պատասխան ասաց նախարարը: Մեր հստակեցմանը, թե իրավիճակն իրո՞ք խայտառակ էր, նախարարը խուսափեց ուղիղ պատասխան տալ. «Եթե դուք տաք խայտառակ-ի բնորոշումը, թե ինչ պարամետրերով եք դա որոշում, ես կասեմ` իրակա՞ն է, թե՞ ոչ իրական: Ես ընդամենը տեսնում եմ լուրջ խնդիրներ՚:
Միևնույն ժամանակ, առողջապահության ոլորտում ստուգումները շարունակվում են, և չեն դադարում խոսակցություններն այն առթիվ, որ հնարավոր է այնուամենայնիվ ստուգումների արդյունքում քրեական գործեր հարուցվեն: Նախարարից հետաքրքրվեցինք, թե հիմքեր տեսնո՞ւմ է գործերի հարուցման համար: «Ես չէի ցանկանա: Բժիշկները միշտ կողմ են աշխատել օրինական դաշտում: Եթե որոշ թերացումներ էլ կան, որոնց հետևանքով խախտումներ ենք արձանագրում, պետք է հասկանանք, որ ոչ թե ավելի շատ մտածված գործողություններ են: Ես ավելի շուտ կասեի` չիմանալու հետ կապված գործողություններ են եղել»,- ասաց նախարարը: Վերջինս պնդեց, որ կատարվածը քաղաքական պրոցեսների հետ կապ չունի: «Օրինակ` Հանրային գրադարանի շինարարության հարցը ո՞նց կարող ենք կապել քաղաքական պրոցեսների հետ: Կապ չունի, որ կուսակցության անդամ է: Եթե օրենքը խախտել է, նա պետք է պատասխան տա: Ես ՀՀԿ ԳՄ անդամ եմ, ինձ թույլատրվում է խախտե՞լ օրենքը: Նախագահական ընտրություններից հետո էլ մենք պետք է նույն ոճով աշխատենք»: Ինքը` Դերենիկ Դումանյանը, պատրաստ է գնալ հարցաքննության, եթե քրեական գործ հարուցվի. «Եթե նա հանցագործ է, պետք է պատասխան տա»: Ինչ խոսք, իշխող կուսակցության անդամի` ՀՀԿ գերագույն մարմնի ներկայացուցչի համար այս թեմայով հեշտ է խոսելը: Մեր հարցին, թե իր կարծիքով` իր նախորդի` ԲՀԿ ներկայացուցիչ Հարություն Քուշկյանի պարագայում քրեական հետապնդում կլինի՞, Դումանյանը հակադարձեց. «Իսկ ինչո՞ւ պետք է լինի: Նման հիմքեր ինձ հայտնի չեն: Ես շատ կուզենամ, որ իմ կոլեգայի նկատմամբ նման հետապնդումներ չլինեն, որովհետև ես չեմ կարծում` ինքը որևէ սխալ թույլ է տվել»:
Իսկ ընդհանրապես, Դերենիկ Դումանյանը բազմաթիվ փոփոխություններից խոսեց, որ պատրաստվում է իրականացնել առողջապահության ոլորտում: Հարցրինք` չի՞ կարծում, որ վարդագույն ակնոցներով է նայում, և եթե իր ծրագրերը մի 6 ամիս հետո չիրագործվեն, ի՞նչ է անելու, հրաժարական կտա՞: «Եթե որևէ մեկն իր առջև ծրագիր է դնում և այդ ծրագիրը չի կատարում, միանշանակ հրաժարական է տալիս: Իհարկե, կտամ»,- հայտարարեց նախարարը` հավելելով. «Ես պետք է վարդագույն հայացքով նայեմ, որ կարողանամ հասնել էդտեղ, եթե ես սև ակնոցներով նայեմ, ուրեմն տեղ չեմ հասնի: Ես պետք է պատկերացնեմ` ուր եմ ուզում գնալ, որ հասնեմ: Մի դեպք հիշեցի. երբ նոր էի աշխատանքի ընդունվել Առողջապահության ազգային ինստիտուտում, մի քանի ամիս հետո ծրագիր կազմեցի, գծագիր գծեցի, երբ գիտխորհրդին ներկայացնում էի, ամբիոնի վարիչներից մեկը մոտեցավ ինձ, թե` Նյու Վասյուկի՞ եք կառուցելու: Մի քանի տարի հետո ինքը մոտեցավ, ասաց` Դուք կառուցեցիք Նյու Վասյուկի»: Հիմա Դուք Նյու Վասյուկի եք կառուցելու Առողջապահության նախարարությունո՞ւմ` հարցրինք մենք: «Չէ՜, ես դա ընդամենը ասացի նրա համար, որ մարդ, իհարկե, իր աշխատանքի մեջ պետք է նպատակ դնի և կյանքում նաև»,- հայտարարեց ՀՀԿ-ական նախարարը:
