Ֆրանսիայի կառավարությունը մշակել է Կորսիկայի հետ կազմակերպված հանցավորության դեմ պայքարի ծրագիր: Ինչպես հաղորդում է բրիտանական The Guardian-ը, այդ թեմայով հայտարարությամբ երկրի վարչապետ Ժան-Մարկ Էրոն հանդես է եկել Կորսիկայում հայտնի իրավաբան Անտուան Սոլլակարոյի սպանությունից 6 օր անց: Դրան նախորդել էր մահափորձերի մի ամբողջ շարք, որին զոհ էր գնացել 14 մարդ, և որը կապում են կազմակերպված հանցավոր խմբավորումների գործունեության հետ:
Կառավարական ծրագիրը ներառում է 10 քայլ, այդ թվում` ազգային ժանդարմերիայի հատուկ ստորաբաժանման ստեղծում, որը կհամակարգի համապատասխան քրեական գործերի հետաքննությունը: Էրոյի խոսքերով՝
15 սպանությունների մեծ մասը, որոնցից ոչ մեկը դեռ չի բացահայտվել, ունեն տնտեսական, իսկ 9-ը` ֆինանսական ենթատեքստ:
«Հատուկ ուշադրություն պետք է դարձվի փողերի լվացման դեմ պայքարին, հատկապես անշարժ գույքի բնագավառում, ինչպես նաև սպորտում, և պետպատվերների և քաղաքային շինարարության ոլորտներում»,- հայտարարել Ֆրանսիայի վարչապետը:
Սոլլակարոյի սպանությունը հասարակական լայն արձագանք է ստացել Ֆրանսիայում: Ֆրանսիայի նախագահ Ֆրանսուա Օլանդը հայտարարել է, որ կղզում բռնության մակարդակն «անընդունելի է»:
Վերջին տասնամյակում բռնության ալիքը Կորսիկայում չի դադարում, ընդ որում` եթե նախկինում անհանգստության գլխավոր հրահրողները անջատողականներն էին, ապա վերջին տարիներին խոսքն առավելապես կազմակերպված հանցավորության մասին է:
