Բավականին երկար ժամանակ է, որ մասնագետները վիճում են բուսակերության հարցի շուրջ: Այդ ասպարեզում որոշել են իրենց ներդրումն ունենալ նաև Լոմա Լինդայի համալսարանի աշխատակիցները։ Նրանք եկել են այն եզրահանգման, որ մսից հրաժարվելն ավելի շատ դրական, քան բացասական կողմեր ունի:
Այս թեմայի շուրջ հետազոտությունները համալսարանն անցկացրել է դեռևս նախորդ դարի 70-80-ական թթ.: Հենց այդ ժամանակ են գիտնականները հետևել մի քանի տասնյակ հազարավոր ադվենտիստների: Հետազոտությունները ցույց են տվել, որ մարդիկ, ովքեր հրաժարվում են կենդանական ծագման սնունդ ընդունելուց, ապրում են ավելի երկար, քան մսակերները:
Գիտնականները նաև բացահայտել են, որ մրգերը, բանջարեղենը, ընկույզը և հատիկավորները նվազեցնում են երկրորդ կարգի շաքարախտի, քաղցկեղի առաջացման հավանականությունը:
Ուսումնասիրության արդյունքում պարզվել է, որ ադվենտիստ-բուսակեր տղամարդկանց կյանքի տևողությունը 83,3 տարի է, իսկ կանանցը` 85,7 տարի: Դա 9,5 տարով երկար է միջին վիճակագրական տվյալներից: Ավելացնենք նաև, որ այն մարդիկ, ովքեր հրաժարվել էին մսից, որպես կանոն, մոտ 14 կգ–ով ավելի թեթև են եղել մսակերներից։
