Լիբիայում նախկին առաջնորդ Մուամար Քադաֆիի մահվան տարելիցին հաղորդագրություններ են ստացվել Քադաֆիի կրսեր որդու՝ Խամիսի մահվան մասին: Al-Arabiya հեռուստաալիքի փոխանցմամբ՝ նախկին առաջնորդի որդին մահացել է վերքերից, որը ստացել էր Բանի Վալիդ քաղաքի համար մղվող մարտերի ժամանակ:
Խամիսը Մուամար Քադաֆիի 7-րդ և կրտսեր որդին էր: Հիշեցնենք, որ նրա մահվան մասին հաղորդագրություններ ստացվում են ոչ առաջին անգամ: Վերջին անգամ Խամիսի մահվան մասին հաղորդվել է անցած տարվա հոկտեմբերին:
Խամիսի ճակատագրի մասին հստակ տվյալներ չկան: Վարկածներից մեկի համաձայն՝ Միսրատա քաղաքի Զինված հեղափոխական խորհրդի ջոկատը Խամիսին ձերբակալել է հոր մահվան տարելիցի օրը, սակայն Լիբիայի ազգային կոնգրեսի ղեկավար Մոհամմեդ Մագրիֆը հաղորդել է, որ Խամիսը սպանվել է Բանի Վալիդի համար մղվող մարտերում: Այլ տեղեկություններով՝ Խամիսը կարող է փախած լինել Նիգեր:
Բանի Վալիդի համար պայքարում հոկտեմբերի 20-ին 9 մարդ է զոհվել, ևս 100-ը վիրավորվել են:
Այսօր տեղեկություն է հայտնվել նաև Մուամար Քադաֆիի ներկայացուցիչ Մուսա Իբրահիմի հնարավոր ձերբակալության մասին:
Հիշեցնենք, որ Լիբիայի առաջնորդ Մուամար Քադաֆին սպանվել է 2011-ի հոկտեմբերի 20-ին:
