Տիբեթի բնակիչը ինքնահրկիզվել է՝ ի նշան տարածաշրջանում Չինաստանի քաղաքականության դեմ բողոքի: Այս մասին հայտնում է Associated Press-ը:
Ինչպես նշվում է՝ երկու երեխաների 27-ամյա հայր Լհամո Քիեբը ինքնահրկիզվել է չինական Գանսու նահանգի վանքի մոտ: Ինքնահրկիզում իրականացնելիս նա բացականչել է կարգախոսներ՝ հաջակցություն Դալայ Լամայի` Տիբեթ վերադարձին: Տեղի անվտանգության ծառայությունների աշխատակիցները փորձել են հանգցնել կրակը, սակայն տղամարդը ստացած վնասվածքներից մահացել է:
Լհամո Քիեբը հոկտեմբերի սկզբից մինչ օրս ինքնահրկիզման դիմած արդեն չորրորդ մարդն է: Նախորդ երեք դեպքերը ևս մահվան ելք են ունեցել:
Free Tibet լոնդոնյան իրավապաշտպան կազմակերպության տվյալներով՝ 2011 թվականի մարտից մինչ օրս, ի նշան Չինաստանի քաղաքականության դեմ բողոքի, ինքնահրկիզման է դիմել Տիբեթի ավելի քան 60 բնակիչ:
