Մեկ տարի առաջ այս օրը հայտնի դարձավ, որ Լիբիայի Սիրթ քաղաքում սպանվել է երկրի առաջնորդ Մուամար Քադաֆին:
Մուամար Քադաֆին, ըստ որոշ տեղեկությունների, ծնվել է Տրիպոլիտանիայում` 1942թ.: Նրա ծննդյան ճիշտ տարեթիվը հայտնի չէ. մի շարք կենսագիրներ պնդում են, որ նա ծնվել է 1940թ.: Ինքը՝ Քադաֆին գրել է, որ ծնվել է 1942թ. բեդվինական վրանում` Սիրթ քաղաքից 30 կմ հարավ:
Դպրոցում Քադաֆին ստեղծել է ընդհատակյա երիտասարդական բջիջ՝ գործող պետական կարգը տապալելու համար (Իտալիայից անկախություն ստանալուց հետո` 1949թ. Լիբիան գտնվում էր Իդրիս 1-ին թագավորի իշխանության տակ): Քադաֆին զբաղվում էր հակակառավարական ցույցերի կազմակերպմամբ, ինչի պատճառվով նրան հեռացրել են դպրոցից: Դրանից հետո նա ուսումը շարունակել է Միսրատա քաղաքում:
1959թ. Քադաֆին ընդունվել է Բենղազիի Լիբիական համալսարան, սկսել ուսումնասիրել մարքսիզմ: 1964թ. նա ավարտել է ուսումը՝ ստանալով իրավաբանի դիպլոմ, որից հետո ընդունվել է Ռազմական ակադեմիա: 1965թ. գործուղվել է բանակ, իսկ հետո ուղարկվել Մեծ Բրիտանիա, որտեղ ուսումնասիրել է զրահատանկային գործ:
1969թ. Քադաֆին նշանակվել է Ազդանշանային կորպուսի համհարզ, գլխավորել այդ ժամանակ երկրի զինված ուժերում բռնկված դավադրություններից մեկը: 1969թ. մի խումբ ապստամբներ` կապիտան Քադաֆիի գլխավորությամբ գրավեցին թագավորական պալատը, կառավարական հաստատությունները, ռադիոն և հեռուստաընկերությունը: Հայտարարվեց Իդրիս թագավորի իշխանության տապալման մասին, և Լիբիան հռչակվեց հանրապետություն:
Քադաֆին զբաղեցրեց Հեղափոխական հրամանատարական խորհրդի ղեկավարի և գերագույն հրամանատարի պաշտոններ: Այդ ժամանակվանից սկսած նա փաստացի ղեկավարում էր երկիրը՝ պաշտոնապես զբաղեցնելով գրեթե բոլոր կարևոր պաշտոնները:
1979թ. Մուամար Քադաֆին հրաժարական տվեց նախագահի պաշտոնից՝ հայտարարելով, որ ցանկանում է աշխատեղ «հեղափոխությունը շարունակելու ուղղությամբ»: Նա պաշտոնապես սկսեց անվանվել հեղափոխության առաջնորդ:
2011թ. փետրվարի կեսերին Լիբիայում սկսեցին զանգվածային հուզումներ, որոնց մասնակիցները պահանջում էին ավելի քան 40 տարի երկիրը ղեկավարած Քադաֆիի հրաժարականը: Ժողովրդական ցույցերը կարճ ժամանակ անց վերածվեցին զինված բախումների կառավարական ուժերի և ընդդիմության միջև: Մարտերի ընթացքում Քադաֆիի վարչակարգի հակառակորդներին հաջողվեց վերահսկողություն հաստատել Լիբիայի մեծ մասի վրա: Օգոստոսին ընդդիմադիրները ՆԱՏՕ-ի ուժերի աջակցությամբ գրավեցին երկրի մայրաքաղաք Տրիպոլին:
Մուամար Քադաֆին սպանվեց 2011թ. հոկտեմբերի 20-ին Սիրթ քաղաքի մերձակայքում: Այնտեղ սպանվեց նաև նրա որդին՝ Մութասիմը: Քադաֆիի սպանության հանգամանքները մինչ այժմ անորոշ են: Հաղորդվում էր, որ նրա ավտոշարասյունը կրակի տակ է հայտնվել, նա վիրավորվել է, որից հետո ապստամբներից մեկը նրան գերի է վերցրել և գնդակահարել: Որոշ տվյալներով՝ սպանությունից առաջ նա կտտանքների է ենթարկվել:
Քադաֆիի մարմինը 4 օր համընդհանուր ցուցադրության է դրվել Միսրատայում, որից հետո
թաղվել է անապատում որդու՝ Մութասիմի հետ: Գերեզմանի վայրը, սակայն, գաղտնի է պահվում, որպեսզի այն սրբավայր չդառնա իր համախոհների համար:
