Վենեսուելայի կառավարությունը լրջորեն որոշել է զբաղվել բանտերում տիրող իրավիճակը բարելավելու ուղղությամբ. ուրբաթ երկրի պաշտոնական թերթում հրապարակվել է հրաման՝ նոր բանտային ենթակառուցվածքների շինարարության և վերականգնման արտակարգ միջոցառումների մասին: Այս մասին հաղորդում է RIA Novosti-ն՝ վկայակոչելով տեղի ԶԼՄ-ները:
Միայն 2012թ. առաջին քառորդում վենեսուելական ուղղիչ հաստատություններում զոհվել է 304 մարդ, 527 մարդ վիրավորվել է: Անկարգությունների գլխավոր պատճառը բանտերի «գերխիտ բնակեցվածությունն» է. 14 հազար հոգու համար նախատեսված բանտերում պահվում է շուրջ 50 հազար բանտարկյալ: Նրանք պարբերաբար պատանդներ են վերցնում՝ պահանջելով բարելավել իրենց պայմանները: Ընդհանուր առմամբ 1999-2010թթ. ընթացքում բանտերում զոհվածների թիվը գերազանցել է 4500-ը:
Հրամանի համաձայն՝ արտակարգ միջոցառումներ պետք է ձեռնարկվեն առաջին երեք ամիսների ընթացքում: Այդ ընթացքում համապատասխան կառավարական մարմինները պետք է միջոցներ ձեռնարկեն նոր բանտերի կառուցման և հները վերականգնելու ուղղությամբ:
Նախագահ Ուգո Չավեսի ստորագրած հրամանի համաձայն` ուղղիչ հաստատությունների խնդիրները լուծելու համար կհատկացվեն նաև անհրաժեշտ հողային տարածքներ:
