Forbes ամսագիրը կազմել է ամենաբարձր վարձատրվող հեռուստատեսային դերասանների ամենամյա վարկանիշային աղյուսակը: Այս տարի ցուցակն առաջնորդում է «2,5 մարդ» սերիալի դերասան Էշթոն Քաթչերը, որի եկամուտը վերջին տարում կազմել է 24 միլիոն դոլար: Քաթչերի կարողությունը կուտակվում է ոչ միայն հեռուստահոնորարներից (չնայած վարկանիշի անկմանը, սերիալը CBS-ի առաջատարներից մեկն է), այլև Skype, Spotify և Airbnb ձեռնարկություններում ներդրումների եկամուտներից:
Նոր վարկանիշում երկու սենսացիա է գրանցվել: Դրանցից գլխավորը անցած տարվա վարկանիշային ցուցակի առաջատար, հոլիվուդյան Փառքի ծառուղում սեփական աստղի արժանացած Չառլի Շինի ռեկորդային անկումն է, որն այս անգամ առհասարակ տասնյակից դուրս է մնացել:
Ամենանկատելի աճը գրանցել է Հյու Լորին, որը հադես է եկել հայտնի դոկտոր Հաուսի դերով: Նա մեկ տարում իր հոնորարները կրկնապատկել է՝ հասցնելով 18 մլն դոլարի: Լորին 7 հորիզոնականով բարելավել է դիրքերը և հայտնվել երկրորդ հորիզոնականում:
Երրորդ հորիզոնականում կատակերգու Ռեյ Ռոմանոն է, որը հայտնի է «Բոլորը սիրում են Ռեյմոնդին» սերիալից (1996-2005): Սակայն 18 միլիոն տարեկան եկամուտը նա ունեցել է «Սառցե դարաշրջան» անիմացիոն ֆիլմում Մենի մամոնտի հնչյունավորումից: 2011-ին նա երկրորդ տեղում էր՝ 20 մլն դոլար եկամուտով:
Հայտնի դերասան Ալեքս Բոլդուինը նկարահանվում է ոչ միայն կինոյում, այլև կատակերգական «Ստուդիա 30» հեռուստասերիալում, որը նրան մեկ տարում 15 միլիոն դոլար եկամուտ է բերել: Բոլդուինը 4-րդ տեղում է:
15 միլիոն տարեկան եկամտով հնգյակը եզրափակում է Մարկ Հերմոնը, որը ջոկատի ղեկավարի դերով է հանդես գալիս «Ծովային ոստիկանություն. Հատուկ բաժանմունք» սերիալում:
