Պետք է աշխատել Ցեղասպանության ոչ միայն ճանաչման, այլև պահանջատիրության ուղղությամբ. այսօր լրագրողների հետ հանդիպման ժամանակ այս մասին ասաց ԵՊՀ պատմության ֆակուլտետի դեկան Էդիկ Մինասյանը՝ անդրադառնալով ԱՄՆ հայ համայնքի տարածած հայտարարությանն այն մասին, որ ԱՄՆ նախագահական ընտրություններում հայ համայնքը չի սատարի և ոչ մի թեկնածուին: Նա հստակեցրեց, որ այս որոշումը դեռևս վերջնական չէ, այն կայացվել է, բայց ամբողջականը չէ: Ըստ նրա՝ նման հայտարարությունը բխում է նրանից, որ ԱՄՆ նախագահների խոստումները «ցեղասպանություն» բառն արտասանելու վերաբերյալ չեն իրականացվել:
«ԱՄՆ նախագահներ Քարթերը և Ռեյգանն էին, որ պահեցին իրենց խոստումները և «ցեղասպանություն» արտահայտությունն ասացին: Մյուս նախագահները չեն գործածել: «Մեծ եղեռն» արտահայատությունը Օբաման շեշտեց: Այստեղ բառի արտասանությունը չէ միայն, որ կարևոր է, միջազգային ճանաչման ուղղությամբ գործնական քայլեր անել է պետք: Այսօր որոշակի հիմքեր կան դրա համար:
Բնական է, որ ԱՄՆ հայ համայնքի չեզոքությունը դրական արդյունք կտա, սա նախնական սթափեցնող կոչ է: Այսօր գործնական խնդիրները լուծելու կարևորություն կա: Պետք է աշխատել պահանջատիրության ուղղությամբ»,- ասաց Է. Մինասյանը՝ կարևորելով հարցի բարձրացումը բարձրագույն ատյանների առջև:
Նրա խոսքերով, պահանջատիրություն ասելով՝ պետք է հասկանալ ոչ միայն տարածքային պահանջները, այլև նյութական ժառանգության փոխհատուցումը:
Լուսանկարը՝ PanARMENIAN Photo-ի
