Մանկավարժական համալսարանը միակն է, որտեղ Հայաստանի պետական երիտասարդական նվագախումբը՝ գեղարվեստական ղեկավար և գլխավոր դիրիժոր Սերգեյ Սմբատյանի ղեկավարությամբ, երկրորդ անգամ է հանդես գալիս դասական համերգային ծրագրով:
Գարնանային համերգաշրջանում Երիտասարդական նվագախումբը Հայ-ամերիկյան դիվանագիտական հարաբերությունների հաստատման 20-ամյակի շրջանակներում «Hollywood Non-Stop» համերգային ծրագրով արդեն ներկայացել էր Մանկավարժական համալսարանում: Այս անգամ նվագախումբը եկել էր շնորհավորելու բուհի հիմնադրման 90-ամյակը եւ կատարելու այն բոլոր ուսանողների խնդրանքը, ովքեր մեծ ցանկություն էին հայտնել մեկ անգամ ևս ներկա գտնվել նրանց համերգին:
Ողջունելով և շնորհավորելով համալսարանի հիմնադրման 90-ամյակի կապակցությամբ, Սերգեյ Սմբատյանն ասել է. «Ձեր լսարանի դրական արձագանքի և պահանջի շնորհիվ այսօր մենք կրկին մանկավարժական համալսարանում ենք: Բոլորի համար կարևոր է սիմֆոնիկ երաժշտությունն ու արվեստը: Ձեզ հետ մենք կապված ենք ամուր կապով, և ուզում ենք, որ այն ավելի հաստատուն դառնա: Միշտ հաճելի է նվագել այն հանդիսատեսի համար, որը հասկանում է քեզ»:
ՀՊՄՀ հիմնադրման 90-ամյակին նվիրված համերգին Հայաստանի պետական երիտասարդական նվագախումբը հանդես եկավ բազմաժանր` ծանոթ և սիրված ստեղծագործություններով: Հնչեցին Ջակոմո Պուչինիի, Յոհան Շտրաուսի,Էդվարդ Միրզոյանի, Ռուբեն Ալթունյանի ստեղծագործություններից, ինչպես նաև լսարանին ծանոթ և համաշխարհային ճանաչում ունեցող կինոերաժշտություններ` Կառլոս Գարդելի «Կնոջ բույրը», Նինո Ռոտայի «Ռոմեո և Ջուլիետ», «Կնքահայրը», Էնիո Մորիկոնեի «Մեկ անգամ ամերիկայում», «Առաքելություն» և այլն:
«Պետք է երիտասարդներին մատուցել սիրված ֆիլմերի երաժշտություններ, որպեսզի նրանք հասկանան, որ իրենց ծանոթ երաժշտությունները ևս դասական են և չպետք է վախենալ ու խուսափել դրանից: Պետք է պրոպագանդել դասական երաժշտությունն այնքան, որ ուղղակի մարդիկ ձգտեն լսել այն»,- ընդգծեց դիրիժորը:
Սերգեյ Սմբատյանը հերքել է այն տարածված կարծիքը, որ այսօր երիտասարդները չեն սիրում դասական երաժշտություն: «Երիտասարդները սիրում են և ավելի քան ձգտում են դեպի դասական երաշժտություն: Նման համերգներն ապացուցում են, որ նրանք ոչ միայն կարևորում են, այլ ունակ են լսել և փորձում են հասկանալ այդ ամենը: Կարծում եմ, որ դահլիճում ներկաներից ոմանք տարբեր պատճառներով ներկա չեն եղել մեր համերգներին, այսօրվանից նրանք կհասկանան, որ դասական համերգները վախենալու չեն, հակառակը` հասկանալի ու մատչելի են»:
Վերջում երիտասարդական նվագախմբի գեղարվեստական ղեկավարը վստահեցրել է, որ Մանկավարժական համալսարանի պրոֆեսորադասախոսական կազմը և ուսանողները դեռևս այլ հնարավորություններ կունենան իրենց կատարմամբ վայելելու նման համերգներ:
