Հոկտեմբերի 17-ին արտգործնախարար Էդվարդ Նալբանդյանն ընդունել է Հայաստանում Հունաստանի նորանշանակ դեսպան Իոաննիս Տաղիսին՝ հավատարմագրերի պատճենի հանձնման կապակցությամբ:
Շնորհավորելով դեսպանին նշանակվելու կապակցությամբ՝ նախարար Նալբանդյանը համոզմունք հայտնեց, որ նրա պաշտոնավարման ընթացքում հայ-հունական ավանդական ջերմ և եղբայրական հարաբերությունները էլ ավելի կընդլայնվեն և կամրապնդվեն։ Նախարարը նշել է նաև, որ Հայաստանը մեծապես կարևորում է երկու ժողովուրդների դարավոր բարեկամության և ընդհանուր արժեքների վրա հիմնված միջպետական համագործակցության շարունակական զարգացումը Հունաստանի հետ:
Դեսպան Տաղիսը շնորհակալություն է հայտնել ընդունելության համար և հավաստիացրել, որ առավելագույն ջանքերը կգործադրի եղբայրական Հայաստանի հետ հարաբերությունների ամրապնդման և որակապես նոր մակարդակի բարձրացման համար:
ՀՀ ԱԳՆ մամլո գրասենյակից «Առաջին լրատվական»-ին հայտնում են, որ զրույցին ընդգծվել է, որ 2011-ին ՀՀ Նախագահի պետական այցելությունը Հունաստան, այցի ընթացքում ձեռք բերված պայմանավորվածությունները և ստորագրված փաստաթղթերը կարևոր լիցք է հաղորդել միջպետական հարաբերություններին։
Նախարար Նալբանդյանը վերահաստատել է սեպտեմբերի 28-ին Նյու Յորքում Հունաստանի ԱԳ նախարար Դիմիտրիս Ավրամոպուլոսի հետ կայացած հանդիպման ընթացքում վերջինիս արված Երևան այցելելու հրավերը։
Հանդիպման ընթացքում երկուստեք գոհունակություն հայտնվեց երկու երկրների միջև առկա քաղաքական երկխոսության, միջխորհրդարանական կապերի, ռազմական համագործակցության բարձր մակարդակի կապակցությամբ:
Զրուցակիցները անդրադարձել են նաև ՀՀ-ԵՄ համագործակցությանը: Այս առումով գոհունակությամբ երկուստեք նշվեց, որ Արևելյան գործընկերության ծրագրի
շրջանակներում Հայաստանն իր արձանագրած առաջընթացով գտնվում է առաջնային
դիրքերում։ Նախարար Նալբանդյանը հավելեց նաև, որ ավարտին են մոտենում Ասոցացման համաձայնագրի շուրջ բանակցությունները, նախատեսվում է, որ վաղը Բրյուսելում կնախաստորագրվի մուտքի արտոնագրային ռեժիմի դյուրացման մասին համաձայնագիրը, դինամիկ և կառուցողական կերպով առաջ են գնում խորը և համապարփակ ազատ առևտրի գոտու ստեղծման շուրջ
բանակցությունները:
Հայաստանի արտգործնախարարն ու Հունաստանի դեսպանը մտքեր են փոխանակել տարածաշրջանային և միջազգային զարգացումների շուրջ:
