Փոփ երգչուհի Բեյոնսեն ելույթով հանդես կգա ամերիկյան ֆուտբոլի Սուպերգավաթի (Super Bowl) խաղարկության ընդմիջման ժամանակ, որը տեղի կունենա 2013-ի փետրվարի 3-ին: Այս մասին հաղորդում է Associated Press-ը: Ծրագրված ելույթի մասին տեղեկությունն արդեն հաստատել են Ֆուտբոլի ազգային լիգայում:
Ֆուտբոլային լիգայի հետ համագործակցությունը առաջինը չէ Բեյոնսեի համար: 2004 թվականին նա ԱՄՆ-ի հիմն էր կատարել Սուպերգավաթի խաղարկությունից առաջ:
2012 թվականին NFL-ի սեզոնի գլխավոր խաղի ընդմիջմանը ելույթ էին ունեցել Մադոննան, երգչուհի M.I.A.-ն, Սի Լո Գինը, Նիկի Մինաժն ու LMFAO խումբը:
Բեյոնսեի ապագա ելույթի ծրագիրը չի հրապարակվել: Ենթադրվում է, որ նա բեմ կբարձրանա իր ամուսնու՝ Jay-Z-ի հետ, ինչպես նաև` Destiny’s Child խմբի նախկին գործընկերներ Քելլի Ռոուլենդի և Միշել Ուիլյամսի:
Խաղը տեղի կունենա Նոր Օռլեանում: Քաղաքը գլխավոր խաղը հյուրընկալել է նաև 2002 թվականին: Խաղի ընդմիջման շոուի պաշտոնական հովանավորն է Pepsi ընկերությունը: Խաղը կհեռարձակի CBS հեռուստաալիքը:
