Հանթսմանների խոսելը կլինի ամպրոպի նման և շատ հետաքրքիր հետևանքներ կունենա որոշ մարդկանց համար. այսօր լրագրողների հետ հանդիպման ժամանակ այս մասին ասաց ԱԺ ԲՀԿ խմբակցության պատգամավոր, նախկին արտգործնախարար Վարդան Օսկանյանի փաստաբան Տիգրան Աթանեսյանը` խոսելով Օսկանյանի դեմ իրականացվող քաղաքական հետապնդման վերաբերյալ Հանթսմանների հնարավոր արձագանքից: Նա նշեց, որ Հանթսմանների խոսելը կլինի ամպրոպի նման, կգա ժամանակը՝ կխոսեն: Ըստ փաստաբանի` Հայաստանում այդ ընտանիքի բարի համբավն է ոտնահարվում:
«Նրանք կխոսեն, և դա շատ հետաքրքիր հետևանքներ կունենա որոշ մարդկանց համար, որովհետև այդ անունը հոլովելը պատիվ չի բերում Հայաստանին, դա մեր ազգային շնորհակալությունն էր: Որքան ես գիտեմ` շատ բացասաբար են վերաբերվում տեղի ունեցող բոլոր գործընթացներին»,- նկատեց Աթանեսյանը: Անդրադառնալով որոշ պաշտոնյաների խոսքերին, թե Օսկանյանը պետք է բարձր գոռար իր անմեղությունն ապացուցելու նպատակով` նա ընդգծեց, որ լռությունը շատ անգամ ավելի բարձր ճիչ է:
«Այս գործն ունի մի ելք` շուտափույթ կարճում: Մարտի 1-ը չմոռանանք` թե դատարաններն ինչ քաղաքական պատվերի են ունակ: Այս երկրում ոչ ոք էլ չի վստահում նախաքննության մարմնին»,- իր տեսակետը հայտնեց Օսկանյանի փաստաբանը` շարունակելով, որ իրականացնելու է սովորական պաշտպանություն` ի ցույց դնելով գործի շինծու հիմքերն ու կարճման ենթակայությունը:
Հիշեցնենք, որ Օսկանյանին մեղադրանք է առաջադրել ՀՀ ՔՕ 179 (ուրիշի ունեցվածքի առանձնապես խոշոր չափերի յուրացում) և 190 (անօրինական ճանապարհով ձեռք բերված եկամուտների լեգալացում) հոդվածների հատկանիշներով:
