Ադրբեջանական Trend լրատվական գործակալության փոխանցմամբ՝ Վրաստանի նախագահ Միխեիլ Սաակաշվիլին մասնակցելու է «Եվրոպայի ժողովրդական» կուսակցության (ԵԺԿ) գագաթնաժողովին, որը հոկտեմբերի 17-18-ը տեղի է ունենալու Բուխարեստում: Այս մասին հայտնել է Վրաստանի նախագահի աշխատակազմը:
Վերջինիս հաղորդմամբ՝ ակնկալվում է, որ Սաակաշվիլին ելույթ է ունենալու այդ գագաթնաժողովում: Գագաթնաժողովի մասնակիցների թվում են հայտնվել նաև Գերմանիայի կանցլեր Անգելա Մերկելը, Լեհաստանի վարչապետ Դոնալդ Տուսկը, ինչպես նաև Հունգարիայի, Իսպանիայի, Իռլանդիայի, Լատվիայի, Բուլղարիայի, Մալթայի, Պորտուգալիայի, Հունաստանի, Ալբանիայի ու Մոլդովայի վարչապետները:
Բացի այդ, ԵԺԿ-ի գագաթնաժողովին մասնակցելու են ԵՄ-ի Խորհրդի նախագահ Հերման վան Ռոմպեյը, Եվրահանձնաժողովի նախագահ Ժոզե Մանուել Բառոզուն, ինչպես նաև ԵԽԽՎ-ի ղեկավար Ժան-Կլոդ Մինյոնը: ԵԺԿ-ն հիմնադրվել է 1976 թվականին և ներառում է 39 երկրների ազգային կուսակցությունները ներկայացնող 73 կոլեկտիվ անդամների:
