«Ստեղծելով «Հայերի համաշխարհային կոնգրեսը»՝ ես վստահ էի, որ այն մեծ դեր է կատարելու հայերի համախմբման գործում: Ես այդ ժամանակ եղա 17 երկրներում և կարողացա համաձայնության գալ կառույցին աջակցելու հարցում՝ հանուն հայերի համախմբման, Ցեղասպանության ճանաչման և այլ նպատակների»,- «Արմնյուզ» հեռուստաընկերության «Բանաձև» հաղորդման եթերում ասել է Ռուսաստանի հայերի միության և «Հայերի համաշխարհային կոնգրեսի» նախագահ Արա Աբրահամյանը:
Նա նշել է, որ իրեն հաջողվում է փոխշահավետ համաձայնությունների գալ, իսկ ձեռքբերումներն էլ պայմանավորված են նաև նրանով, որ ուղիղ ՌԴ ղեկավարության հետ են աշխատում:
Արա Աբրահամյանը մշտապես հանդիպումներ է ունենում նաև ՌԴ-ում բնակվող ադրբեջանցիների ղեկավար ներկայացուցիչների հետ՝ համեմատաբար խաղաղ ապրելու նպատակադրմամբ: «Հիշում ենք, որ Կրասնոդարում եղան ազգային խնդիրներ. հանդիպումներ ենք ունենում և ասում՝ ինչ պետք է անենք: Տարին մեկ-երկու անգամ հանդիպում եմ Ադրբեջանի դեսպանության և համայնքի ղեկավարների հետ: Եթե չանենք, անպայման խնդիրներ ենք ունենալու, որովհետև մանավանդ բիզնեսին վերաբերող հարցերը ազգային խնդիր են դարձնում: Մենք ասում ենք, որ մենք ապրում ենք Ռուսաստանում և իր օրենքներին պետք է ենթարկվենք»,- ասել է Արա Աբրահամյանը:
Նրա խոսքերով, Ադբեջանը բավական մեծ աշխատանք է կատարում ՌԴ-ում բնակվող հայերին անվանարկելու ուղղությամբ, հանդես գալիս պատերազմի սպառնալիքներով, հատկապես՝ Սաֆարովի հայտնի դեպքից հետո: Ա. Աբրահամյանը նաև մտավախություն ունի, որ Սաֆարովի այլանդակ գործելաոճը կարող է կրկնվել. «Դա ամենամեծ պրոբլեմներից մեկն է, մարդիկ փորձում են հերոսանալ, աղքատ ադրբեջանցիներ շատ կան Ռուսաստանում, որ կփորձեն նման բաներ անել: Դրա համար էլ մենք ադրբեջանցիների հետ հանդիպում ենք, զրուցում, կազմակերպում համատեղ միջոցառումներ»:
Անդրադառնալով ԼՂՀ միջազգային ճանաչմանը՝ Արա Աբրահամյանը նշել է. «Հայաստանն առաջինը պետք է ճանաչեր ԼՂՀ անկախությունը: Եթե Ադրբեջանը շարունակի իր այդ քաղաքականությունը, մենք պետք է նաև դա անենք»:
Խոսելով Սիրիայում տիրող իրավիճակից և սիրիահայության խնդիրներից՝ Ա. Աբրահամյանն ասել է. «Մենք որտեղ ապրում ենք, այդ երկիրը դառնում է մեր հայրենիքը, մենք այդտեղ ենք ապրում ե՛ւ լավ օրերին, ե՛ւ վատ օրերին: Պետք է ճշտենք՝ ուզո՞ւմ են սիրիահայերը գալ, թե՝ ոչ: Պետք է օգնություն ցույց տալ. դա միայն տեղափոխելը չէ»:
Նշենք, որ «Օգնիր եղբորդ» նախաձեռնության հավաքած պարենը Հայաստանից Սիրիա հասցնելու համար օդանավ տրամադրել է Արա Աբրահամյանը:
