Իրանի դեմ պատերազմ սկսելու դեպքում Իսրայելը կարող է իր ռազմական օդանավերի վերալիցքավորման համար օգտագործել նաև Ստեփանակերտի նորակառույց օդանավակայանը. այսօրվա ասուլիսում նման հայտարարություն արեց ՌԴ աշխարհաքաղաքական հետազոտությունների ակադեմիայի փոխնախագահ Արայիկ Սարգսյանը: Նրա խոսքերով՝ Թուրքիայի կողմից Սիրիա ներխուժելու դեպքում Իրանը հանդես կգա Սիրիայի պաշտպանությամբ:
«Էդ ծրագրին վաղուց է սպասում Իսրայելի կառավարությունը: Ամերիկայի Միացյալ Նահանգների իշխանությունների սպառնալիքներն են այժմ Իսրայելին խոչընդոտում՝ չսկսելու ռազմական գործողություններ Իրանի դեմ:
Իսրայելի կողմից Իրանի նկատմամբ ռազմական գրոծողություններ սկսելու դեպքում հիմնական թիրախը պետք է լինեն Իրանի միջուկային կենտրոնները: Իսրայելի օդուժը չունի հնարավորություն, առանց մեր տարածաշրջանում վերալիցքավորման, թռչել Իսրայելից, ռմբակոծել Իրանը և վերադառնալ Իսրայել: Դրա համար նրանց պետք է մեր տարածաշրջանում մի քանի ժամանակավոր թռիչքուղի և օդակայան, որպեսզի ինքնաթիռը կարողանա գոնե Իրանին կից տարածքում վայրէջք կատարել»,- բացատրեց Արայիկ Սարգսյանը:
Ա. Սարգսյանն ընդգծեց, որ այս տարվա մայիսից ադրբեջանա-իսրայելական բանակցությունների հիմնական թեման եղել է Ադրբեջանի տարածքում գործող օդանավակայանների տրամադրումը Իսրայելին Իրանի դեմ հավանական պատերազմի դեպքում: Ըստ բանախոսի՝ իսրայելական կողմն այս պարագայում մեծ հաջողությամբ կարող է օգտագործել նաև Ստեփանակերտի նորակառույց օդանավակայանը: «Քանի որ մինչ օրս հայկական կողմը ձեռնպահ է մնում իր իրավունքից օգտվելուց, ապա մեծ հաջողությամբ իսրայելական ինքնաթիռները կարող են վայրէջք կատարել նաև Ստեփանակերտում»,- ասաց նա:
Լրագրողների այն հարցին, թե արդյո՞ք Հայաստանի կամ Ղարաբաղի իշխանությունները թույլ կտան Իրանի դեմ ռազմական գործողությունների դեպքում օգտագործել նաև Ստեփանակերտի օդանավակայանը, Արայիկ Սարգսյանը պատասխանեց, որ ո՛չ Հայաստանի, ո՛չ էլ ԼՂՀ իշխանությունների կամքը հարցնող չի լինի: «ԼՂՀ իշխանությունները ձայնազուրկ են: Հայաստանի այս քաղաքականությունը նրանց ստիպել է դառնալ ձայնազուրկ: Իսկ Հայաստանի իշխանություններին ոչ ոք չի հարցնի»,- ասաց նա:
Այս հարցում ռուսական գործոնի առնչությամբ նա լռեց՝ ասելով, թե առայժմ չի կարող խոսել այդ մասին:
