Եվամիության 27 անդամ երկրների արտգործնախարարները Լյուքսեմբուրգում, ինչպես սպասվում է, հավանություն կտան Սիրիայի դեմ պատժամիջոցների հերթական` 18-րդ փաթեթին: Այս մասին հայտնում է РИА Новости-ն:
Դիվանագիտական աղբյուրների տվյալներով` սիրիական ռեժիմի նկատմամբ հետագա ճնշման միջոցներն իրենց մեջ ներառում են սիրիական ավիաընկերությունների օդանավերի թռիչքների և վայրէջքի արգելք ԵՄ երկրներում, երրորդ երկրի միջոցով Դամասկոսին զենքի օդային և ծովային մատակարարումների ապահովագրության պաշտոնական արգելք: Բացի այդ, ֆիզիակական և իրավաբանական անձանց սև ցուցակը, որոնց մուտքը ԵՄ երկրներ արգելված է, և որոնց ակտիվները Եվրոպայում սառեցվում են, կհամալրվի ևս 28 սիրիացի պաշտոնյայով:
Ներկայում այդ ցուցակում ընդգրկված են 52 սիրիական ընկերություններ և պետական կառույցներ, ինչպես նաև Սիրիայի 155 քաղաքացի:
ԵՄ 27 անդամ երկրների ԱԳՆ ղեկավարները հուլիսի 23-ին ընդունել էին հավելյալ միջոցառումներ` ապահովելու Սիրիային սպառազինության մատակարարման էմբարգոն:
