Պակիստանում բժիշկները հաջողությամբ վիրահատել են աղջիկների կրթության իրավունքի համար պայքարող ակտիվիստ Մալալա Յուսաֆզային՝ նրա գլխից հանելով փամփուշտը: 14-ամյա աղջիկը վիրավորվել էր թալիբների գնդակից: Դեպքը տեղի է ունեցել նախկինում թալիբների կողմից օկուպացված Սվատ հովտում, երբ աղջիկը տուն էր վերադառնում դպրոցից:
Ինչպես հաղորդում է իսրայելական MIGnews գործակալությունը, իսլամիստները հայտարարել են, որ երեխայի վրա կրակելու պատճառը եղել է նրա վարած աշխարհիկ կենսակերպը: Պակիստանում «Թալիբան»-ի մամուլի քարտուղարը պաշտոնապես հաստատել է, որ հարձակումը կազմակերպվել է իրենց կողմից, և եթե անգամ հաջողվի փրկել աղջկա կյանքը, նրա հետ, այնուամենայնիվ, հաշվեհարդար կտեսնեն:
Պակիստանի նախագահը և վարչապետը դատապարտել են զինված հարձակումը, ինչի հետևանքով վիրավորվել են ևս երկու աղջիկներ: Դեպքը բուռն արձագանք է գտել նաև մամուլում:
Մալալա Յուսաֆզայը համաշխարհային ճանաչում է ձեռք բերել այն բանից հետո, երբ 2009թ. սկզբին օրագիր էր վարում BBC-ի համար Սվատ հովտում թալիբների կառավարման մասին: «Թալիբանը» Սվատում իշխանությունը գրավել է 2007թ.՝ փակելով աղջիկների բոլոր դպրոցները և մտցնելով շարիաթի օրենքներ:
