ԱՄՆ-ում կարծում են, որ Սաուդյան Արաբիայի քաղաքացիներն իրավունք ունեն անցկացնելու ոչ բռնի բողոքի ակցիաներ:
ԱՄՆ պետքարտուղարության հատուկ ներկայացուցիչ Ֆիլիպ Քրուուլին հայտարարել է, որ Վաշինգտոնն աջակցում է մարդու համընդհանուր իրավունքներին, այդ թվում` ազատ հավաքներին և խոսքի ազատությանը: Այս մասին հաղորդում է «Ազատություն» ռադիոկայանը:
Այս հայտարարությունը հետևել է Սաուդյան Արաբիայի ներքին գործերի նախարարի այն հայտարարությանը, համաձայն որի, երկրում արգելվել են բոլոր տեսակի զանգվածային միջոցառումները: Վերջին օրերին Սաուդյան Արաբիայի արևելյան շիայաբնակ շրջաններում տեղի էին ունենում բողոքի ակցիաներ, իսկ Facebook սոցիալական ցանցում կոչեր են տարածվել «ցասման օր» կազմակերպելու համար:
Իրավիճակն ավելի հանգիստ չէ նաև Քուվեյթում, որտեղ երիտասարդական կազմակերպություններն այսօր բողոքի ցույցեր են կազմակերպել վարչապետ Նասեր Ալ-Սաբահի հրաժարականի պահանջով: Ալ-Սաբահ ընտանիքն արդեն 250 տարի շարունակ գտնվում է երկրի վերնախավում, և ցուցարարների այն պահանջը, համաձայն որի, անհրաժեշտ է վարչապետ նշանակել ոչ այդ ընտանքից, զգալի վտանգում է Ալ-Սաբահի քաղաքական ապագան:
