Թուրքական Anadolu լրատվական գործակալության փոխանցմամբ՝ Հյուսիսային Իրաքի քրդական ինքնավարության ղեկավար Մասուդ Բարզանին Էրբիլում տեղի ունեցած միջազգային կոնֆերանսի ժամանակ ժողովրդավարական ու խաղաղ եղանակներով պայքար մղելու կոչ է արել Թուրքիայի, Սիրիայի, Իրանի և Իրաքի քրդերին:
Ընդգծելով, որ զինված պայքար մղելու ժամանակներն անցել են՝ Բարզանին նրանց կոչ է արել վայր դնել իրենց զենքը: Ըստ Բարզանիի՝ եկել է ժամանակը, որպեսզի իրենք իրենց առջև դրված խնդիրներին հասնելու համար օգտվեն խորհրդարանների նման դիվանագիտական աղբյուրներից և երկխոսություն ծավալեն:
Նա հավելել է, որ եթե քրդերը հրաժարվեն իրենց պահանջների իրագործմանը զենքի ուժով հասնելուց, ապա կարող են ստանալ միջազգային հանրության աջակցությունը: Բարզանին հիշեցրել է, որ իրենք դեռ որևէ տեղեկություն չունեն Իրաքի նախկին նախագահ Սադամ Հուսեյնի կառավարման ժամանակ Հյուսիսային Իրաքում անհետացած իրենց 180,000 քաղաքացիների մասին:
