Պակիստանի իշխանությունները խոստացել են 105 հզ դոլարով պարգևատրել այն տեղեկատվության համար, որը կօգնի գտնել 14-ամյա իրավապաշտպան Մալաու Յուսուֆզայի դեմ մահափորձ կազմակերպած թալիբներին: Այս մասին հոկտեմբերի 10-ին հաղորդում է BBC News-ը:
Ներկա դրությամբ Մալալա Յուսուֆզային, որի վզից հոկտեմբերի 10-ին հեռացրել են փամփուշտը, շարունակում է մնալ Փեշավարի ռազմական հոսպիտալում: Աղջիկը ծայրահեղ վիճակում է գտնվում և դեռ գիտակցության չի եկել վիրահատությունից հետո:
Գրոհայինները փորձել են գնդակահարել աղջկան, երբ նա դասընկերուհիների հետ դպրոցից տուն էր վերադառնում: Որոշ տվյալների համաձայն` ահաբեկիչները վիրավորել են ևս մի քանի աղջիկների:
Մալալա Յուսուֆզային BBC-ի համար 11 տարեկանից բլոգ է գրել, որտեղ պատմել է թալիբների օրոք իրենց կյանքի մասին: Իր բլոգում, որը շուտով աշխարհահռչակ է դարձել, Մալալան նկարագրել է մահապատիժները, հրաձգությունները և սպանությունները: Արդյունքում, 2011թ-ի սկզբին նա հայտնվել է գրոհայինների զոհերի ցուցակի առաջին հորիզոնականում: