Грузия Online-ի փոխանցմամբ՝ «Վրացական երազանք» դաշինքի առաջնորդ, միլիարդատեր Բիձինա Իվանիշվիլին Forbes պարբերականի ռուսական տարբերակին տված հարցազրույցում հայտարարել է, որ անձամբ ծանոթ չէ Ռուսաստանի նախագահի ու վարչապետի հետ.
«Ես երբեք անձամբ չեմ հանդիպել Պուտինի կամ Մեդվեդևի հետ՝ թեև կարծում եմ, որ պարտավոր եմ անել ամեն ինչ՝ Ռուսաստանի հետ բարեկամական հարաբերություններ հաստատելու համար, դրան նպաստելու համար: Տեսնենք, թե ինչ կստացվի. ես հուսով եմ, որ դա ստացվելու է:
Ես բազմաթիվ ընկերներ ունեմ Ռուսաստանում և լավ եմ ճանաչում տեղի գործարարներին, մտավորականությանը, գիտնականներին: Մենք լավ ենք ճանաչում միմյանց և կարոտում ենք իրար: Վրաստանի համար կարևոր է ռուսական շուկան: Կարծում եմ, որ առաջին փուլում նվազագույնը պետք է վերականգնվեն առևտրային ու մշակութային հարաբերությունները՝ առանց նախապայմանների:
Ես հասկանում եմ, որ հարաբերությունները փակուղի են մտել, սակայն պետք է դուրս գալ դրանից: Ես բազմիցս ասել եմ, որ լարված հարաբերությունների հիմնական մեղավորը նախագահ Սաակաշվիլին է, որը դեռ մինչև պատերազմը իր հռետորիկայով նպաստեց սահմանների փակմանը, ինչին հաջորդեց օգոստոսյան պատերազմը: Եթե չլիներ նրա արկածախնդրությունը, ապա ոչինչ էլ տեղի չէր ունենա:
Ես չեմ արդարացնում Ռուսաստանին, սակայն առաջին հերթին պետք է հարցնել մեզ, մեր կառավարությանը: Ռուսաստանը մեծ ագրեսիա է գործել, ինչը մեծապես վիրավորական է և անթույլատրելի: Թեև որոշակի ժամանակ է անցել, սակայն ցավը չի անցել ու վերքերը չեն սպիացել: Երկու կողմն էլ պետք է ձգտի դուրս գալ փակուղուց և նպաստի խնդրի կարգավորմանը»:
