«Ոստիկանության միսիան ոչ թե դասեր տալն է, այլ կարգ ու կանոն հաստատելը։ Իսկ այն, ինչ մենք տեսանք, իրենց իրավասությունից շատ ավելին էին թույլ տալիս։
Նրանք իրենց դերը քաղաքականացրել են, մեզ էլ խորհուրդներ են տալիս, թե մենք մեր գնահատականներում շտապել ենք։ Չես հասկանում։ Քիչ է մնում՝ ասես, թե դու ով ես»,- այսօր ԱԺ բրիֆինգների ժամանակ ասաց ՀՅԴ խմբակցության ղեկավար Վահան Հովհաննիսյանը՝ արձագանքելով «Ժառանգության» հետ կապված միջադեպին և ոստիկանության պահվածքին։
Նա նաև ավելացրեց, որ սպասում են ոստիկանության հաղորդագրությանը։ Ավելին, ոչ թե քննության արդյունքերին են սպասում, այլ ոստիկանության գնահատականին, որը պատասխան կտա, թե ինչու է այդպես արվել։
Արձագանքելով ՀԱԿ առաջնորդ Լևոն Տեր-Պետրոսյանի 15-կետանոց պահանջների վերաբերյալ հարցին՝ Վ. Հովհաննիսյանը ասաց. «Անկեղծ ասած՝ ես ժամանակ չեմ գտել և, հավանաբար, չեմ էլ գտնի՝ կարդալու այդ պահանջները։ Ինձ շատ հետաքրքիր է կոալիցիայի արձագանքը, ըստ որի` եթե Լևոն Տեր-Պետրոսյանը ոչ թե պահանջի, այլ առաջարկի, կքննարկեն, օրինակ, վարչապետի հրաժարականը։ Բայց եթե լինի պահանջ՝ ո՛չ։ Ես այդ պատասխանի մեջ իմաստ չտեսա, հետևաբար նպատակահարմար չգտա շարունակել այն կարդալը»։
