Տրանսպորտի և կապի նախարար Գագիկ Բեգլարյանն այսօր կառավարությունում լրագրողների հետ ճեպազրույցում ասաց, որ համապատասխան ստորաբաժանումներին արդեն տվել է հանձնարարականներ` ստուգումներ անցկացնելու ոլորտի ընկերությունների հարկային պարտավորությունների կատարման ուղղությամբ:
«Ոլորտում հարկային պարտավորությունների ուղղությամբ կատարված ուսումնասիրության արդյունքները լրացուցիչ կներկայացվեն: Կասվի, թե ովքեր են թերացել, ովքեր` պատժվել, իսկ ովքեր չեն թերացել, մեր կողմից կարժանանան գովասանքի խոսքերի»,- ասաց նախարարը:
Անդրադառնալով Սերժ Սարգսյանի հանձնարարականներին` Գագիկ Բեգլարյանը նշեց, որ թերությունների վերացման ուղղությամբ աշխատանքներ են կատարվում:
«Նախագահի հայտարարությունն ու հորդորները բոլորին էին վերաբերում, բոլորն այդ ուղղությամբ աշխատում են: Բոլորս գիտենք` կան թերություններ, մենք պետք է անպայման վերացնենք դրանք: Մեր նախարարությունում կատարվել են մի քանի հանձնարարականներ: Թերությունները վերացվում են` 90 տոկոսով վերացված են արդեն»,- ընդգծեց նա:
Ինչ վերաբերում է Գագիկ Բեգլարյանի եղբորը, ով ազատվեց Գնումների աջակցման կենտրոնի ղեկավարի պաշտոնից, ապա նախարարը նշեց, որ չի ուզում պատասխանել եղբորը վերաբերող հարցերին, քանի որ հնարավոր է` իր գնահատականները սուբյեկտիվ լինեն:
Հարցին, թե ի վերջո` ի՞նչ ձևակերպմամբ են եղբորն ազատել աշխատանքից, Գագիկ Բեգլարյանն ասաց. «Ազատողին հարցրեք»: Նա նաև նշեց, որ եղբայրը մի քիչ կհանգստանա, կզբաղվի բիզնեսով:
