Կառավարության այսօրվա նիստի սկզբում վարչապետ Տիգրան Սարգսյանը հիշեցրեց, որ հարկահավաքության խնդիրը պետք է լինի նախարարների ուշադրության կենտրոնում: Նա ընդգծեց, որ դա անձամբ նախագահ Սերժ Սարգսյանի հանձնարարականն է: «Դա ենթադրում է, որ բոլոր նախարարները պետք է տիրապետեն վիճակին, թե ինչպիսին է իրենց ոլորտում տնտեսական աճի ցուցանիշը, և ինչպես են իրենց ոլորտի ձեռնարկությունները կատարում հարկային պարտավորությունները»,- ասաց վարչապետը:
Տիգրան Սարգսյանը նաև ընդգծեց, որ հարկահավաքության ոլորտում պետք է բացառել ցանկացած միջնորդություն: Նա նշեց, որ իր անձնական հսկողության տակ է պահելու այդ հարցը: «Բոլորը պետք է քաջ գիտակցեն, որ հարկերի հավաքագրումը պատասխանատու գործառույթ է, և միայն ՊԵԿ-ի պատասխանատվության հարց չէ դա, բոլոր նախարարներն են պատասխանատու»,- նշեց վարչապետը:
Կառավարության հաջորդ նիստից նախարարները կսկսեն ներկայացնել իրենց ղեկավարած ոլորտների տնտեսական ցուցանիշներն ու հարկահավաքության գործընթացը:
Լուսանկար՝ PanARMENIAN Photo-ի
