ՀՀ կրթության և գիտության նախարար, ՀՀԿ-ական Արմեն Աշոտյանը երեկ «168 ժամ»-ի թղթակցի հետ զրույցում` անդրադառնալով Վարդան Օսկանյանին անձեռնմխելիությունից զրկելու վերաբերյալ ՀՀ երկրորդ նախագահ Ռոբերտ Քոչարյանի կողմից տարածած հայտարարությանը, ասել է. «Այսօր հետաքրքրությամբ ընթերցեցի նախապես խոստացված և երկար սպասված հայտարարությունը, և երկու տարակուսանք ունեմ հայտնելու, արդյո՞ք երկրում պետք է գոյություն ունենան հանրային-հասարակական կամ պետական ինստիտուտներ, որոնք պետք է գործեն օրենքից դուրս: Երկրորդ տարակուսանքս վերաբերում է հետևյալ հարցին` արդյո՞ք խորհրդարանի երեկվա որոշումը խաչ է քաշում Վարդան Օսկանյանի քաղաքական հնարավոր կարիերայի վրա: Կարծում եմ, երբ մարդն առհասարակ իր գործունեությամբ, կյանքում ունի սիրված պերսոնաժներ, ապա այդ սուբյեկտիվ վերաբերմունքը խանգարում է մարդուն, գործչին՝ օբյեկտիվորեն ընկալելու հնարավորությունները»:
Ա. Աշոտյանի խոսքով` Աժ-ում տեղի ունեցածն առաջինը չէ անկախ Հայաստանի խորհրդարանական պատմության մեջ: «Չեմ կարծում, որ այս դեպքը խորհրդարանի ինքնավարկաբեկման գործընթաց կարող է դիտվել: Հակառակ պարագայում` կարելի է նույն տրամաբանությամբ վարկաբեկված համարել Հայաստանի բոլոր գումարումների խորհրդարանների գոյության ժամանակահատվածը».- ավելացրել է ՀՀԿ-ական նախարարը:
