Այսօր Իրաքի մի շարք քաղաքներում, այդ թվում` մայրաքաղաք Բաղդադում, արգելվել է ավտոմոբիլային տրանսպորտի օգտագործումը, և հավանական է, որ այդ արգելքը տևի ամբողջ օրվա ընթացքում: Այս մասին հաղորդում է France Presse գործակալությունը:
Որոշումը պայմանավորված է այսօր Իրաքում նախանշված զանգվածային բողոքի ակցիաներով: Ցուցարարները բողոքելու են երկրում ծաղկող կաշառակերության դեմ: Այս օրը ստացել է «Ափսոսանքի օր» անվանումը, քանի որ համընկնում է երկրի նոր խորհրդարանի ընտրության 1-ամյակի հետ:
Գործակալությունը փոխանցում է, որ այս պահին փողոցներում ոչ մի տրանսպորտային միջոց չկա: Ցայսօր Իրաքում անցկացված բողոքի ակցիաների ժամանակ, որոնք սկսվել են փետրվարի 17-ից, երբ Եգիպտոսում և Թունիսում իշխանությունից հեռացվեցին տասնյակ տարիներ այդ պաշտոնը զբաղեցնող նախագահները, Իրաքում զոհվել է 16 մարդ, ավելի քան 100 մարդ վիրավորվել է:
