Կարծում եմ իմ մուտքի արգելքը Վրաստան կվերացվի: «Առաջին լրատվական»-ի հետ զրույցում նման տեսակետ հայտնեց «Ջավախք» հայրենակցական միության նախագահ, ԱԺ ՀՀԿ-ական պատգամավոր Շիրակ Թորոսյանը:
Հիշեցնենք, որ ՀՀԿ-ական պատգամավորի մուտքը Վրաստան արդեն երկու տարի է արգելված է: Հայաստանում Վրաստանի արտակարգ և լիազոր դեսպան Թենգիզ Շարմանաշվիլու մեկնաբանությամբ՝ Շիրակ Թորոսյանը լարում է հայերի և վրացիների հարաբերությունները, և նրա ոչ հավասարակշռված հայտարարությունները թույլ չեն տալիս Վրաստանում իրեն ցանկալի մարդ զգալ:
Պատգամավոր Թորոսյանի կարծիքով՝ երեկ Վրաստանում անցկացված խորհրդարանական ընտրությունները էապես տարբերվեցին նախորդ ընտրություններից: «Ջավախահայերը դրական փոփոխությունների են սպասում նորընտիր խորհրդարանական ուժից: Բացի սոցիալ-տնտեսական խոստումներից, Բիձինա Իվանիշվիլին խոստացել է մի շարք բարեփոխումներ անել նաև հայերի համար: Ամենակարևորը մեզ համար Հայ-վրացական համալսարանի բացումն է: Իվանիշվիլին խոստացել է նաև վերականգնել հայոց լեզվի դասաժամերը: Իսկ թե այդ խոստումները ինչ ընթացք կստանան՝ կյանքը ցույց կտա»,- եզրափակեց պատգամավորը:
Իվանիշվիլիի հետ մեծ հույսեր ենք կապում: Անդրադառնալով երեկ Վրաստանում անցկացված խորհրդարանական ընտրությունների արդյունքում հաղթած Բիձինա Իվանիշվիլիին՝ «Առաջին լրատվական»-ի հետ զրույցում ասաց Ջավախքի «Վիրք» չգրանցված կուսակցության համանախագահ Դավիթ Ռշտակյանը: «Նա հենց այստեղ՝ Ջավախքում մեզ մի շարք կարևոր խոստումներ է տվել, և կարծում եմ, որ մոտ ապագայում դրանք կյանքի կկոչի: Առաջին ամենակարևոր խոստումը՝ Վրաստանի սահմանադրության մեջ երկքաղաքացիության մասին օրենքի փոփոխությունն է: Սաակաշվիլին արգելել էր երկքաղաքացիությունը, և ջավախահայերը չէին կարողանում միաժամանակ լինել և՛ Հայաստանի, և՛ Վրաստանի քաղաքացի: Իսկ Իվանիշվիլին շատ կարճ ժամանակահատվածում կփոխի սահմանադրության այդ կետը: Ես դեռևս 2004 թվականին էի ասում, որ Սաակաշվիլին ոչ մի լավ բան հայերի համար չի անի և այդպես էլ եղավ: Նա հիմնովին ավերեց Ջավախքի հայկական դպրոցները, վերացրեց մշակույթը: Ջավախահայերը կտրվել են Հայաստանից և հայերից, ամեն ինչ օտարացրեց նախագահը»:
Ջավախքի մտավորական միության նախագահ Ազատ Շիրակցյան էլ «Առաջին լրատվական»-ի հետ զրույցում մեջբերեց Բիձինա Իվանաշվիլիի Բաթումի ելույթից մի հատված՝ «Հայերը վրացիների բարեկամներն են, Վարդան Մամիկոնյանի դուստր Շուշանիկը վրացիների համար սրբություն է»: Շիրակցյանը, լինելով Բիձինա Իվանիշվիլիի Ախալքալաքի գրասենյակի ղեկավարը, անդրադարձավ նաև երեկ Վրաստանում անցկացված խորհրդարանական ընտրություններին և նշեց, որ դրանք անցել են բավականին հանգիստ, խաղաղ, բացառությամբ մի քանի մանր-մունր միջադեպերի: «Ջավախահայերը մեծ հույսեր են կապում Իվանիշվիլիի հետ: Նա խոստացել է հանրակրթական դպրոցներում մինչև 5-րդ դասարանցիների համար անվճար դասագրքեր բաժանել, հայոց լեզվի ուսուցման հարցին պետք է անդրադառնա: Իվանիշվիլին խոստացել է նաև 1 միլիարդ դոլար տրամադրել գյուղատնտեսությանը, այդպիսով կստանանք նոր տեխնիկա: Հացահատիկը, կարտոֆիլը և մի շարք այլ գյուղատնտեսական ապրանքներ կիրացվեն Վրաստանում, և ստիպված չենք լինի օտար երկրներից ներկրված հումք օգտագործել: Իսկ իրեն նախագահ հռչակած, իբրև թե ազգությամբ հայ Սաակաշվիլին այս տարիների ընթացքում ոչ մի բան չարեց հայերի համար»,- եզրափակեց Շիրակցյանը:
