Ազգային ժողովն արդեն երկու օր է` վերածվել է քրեակատարողական հիմնարկի: Միջանցքներում խորհրդավոր լռություն է: Հայրենի երեսփոխանները աշխատասենյակների մոտ զգուշավոր, մտահոգ դեմքերով ցածրաձայն զրույցի էին բռնվում միմյանց հետ` խուսափելով լրագրողների հարցերից: Թերևս այն մտավախությամբ, որ ոչ ոք ապահովագրված չէ, և մի օր էլ կարող է այդ սուրն իրենց գլխին կախվել: Ինչևէ, ԱԺ «քրեակատարողական հիմնարկ» բերման ենթարկված ՀՀԿ-ական ահել-ջահել պատգամավորները, բացառությամբ վեց հոգու, միասնական կատարեցին հրահանգը` ԲՀԿ-ական գործընկեր Վարդան Օսկանյանին «հանձնելով» իրավապահներին: Դե, որոշ ՀՀԿ-ականներ փորձում էին տակից դուրս գալ լղոզված պատասխաններով` միաբերան կրկնելով, թե Օսկանյանին անձեռնմխելիությունից զրկելն իրավական հարթության վրա է, և դատարանը կորոշի արժանի պատիժը, չնայած ԲՀԿ-ն էլ կոկորդ էր պատռում, թե քաղաքական ճնշում է: Թե ինչու պետք է Օսկանյանից վրեժ լուծեին, եթե ԲՀԿ-ում ավելի խոշոր գործերի կծիկ կարող էին բացել, այդպես էլ այս կոկորդ պատռողները չեն մեկնաբանում:
ՀՀԿ-ական Արմեն Մխիթարյանը, որ երկու օր շարունակ ունկնդրում էր դատախազի և Օսկանյանի պարզաբանումները, եկել է այն եզրահանգման, որ «նախաքննություն է գնում, քննությունը պետք է պարզի` մեղավո՞ր է, թե՞ չէ»: «Հրապարակ»-ի դիտարկմանը, թե ԱԺ-ում կարծիքներ կան, որ այդ տեսակի գործ կարելի է սարքել բոլոր պատգամավորների գլխին, ՀՀԿ-ականը, որ նախկինում ՆԳ աշխատակից է եղել, պատասխանեց. «Ես չեմ գտնում, որ բոլոր պատգամավորների գլխին կարելի է սարքել, բայց մենք պետք է չշտապենք, որովհետև նախաքննություն է գնում, ուղղակի մենք ազատություն ենք տալիս, որ քննչական մարմինը կարողանա քննչական գործողություններ կատարել»: Նշենք, որ սա այն պատգամավորն է, ում երաշխավորությամբ Թոխմախի Մհերի քրոջ որդու կալանքի սանկցիան փոխվեց, և նա գրավի դիմաց ազատ արձակվեց: Իսկ նրա նկատմամբ սպանության կասկածներ կային:
Անկուսակցական Գարեգին Նուշիկյանն էլ կարծում է, որ եթե ժամանակին Օսկանյանն իրավապահ մարմիններին ներկայանար, բանը չէր հասնի ԱԺ: Ինչ վերաբերում է գործի «փուչիկ» լինելուն, ասաց. «Ես չեմ կարծում, որ առանց իրավական հիմքերի գլխավոր դատախազը կգար-կհասներ Ազգային ժողով»: Այն հարցին, թե իր համար դժվար չէ՞ գործընկերոջ դեմ քվեարկելը, պատասխանեց. «Ես կողմ կքվեարկեմ, թե դեմ, թողեք իմ հայեցողությանը»: Քվեարկությունից հետո իր աշխատասենյակի դռան մոտ անվրդով կանգնած Մհեր Սեդրակյանն (Թոխմախի Մհեր) ավելի իրատես գտնվեց: Երբ նրան հարցրինք, թե իրեն երբևէ սպառնո՞ւմ է նման միջնորդության հեռանկար, ուսերը վեր բարձրացնելով` պատասխանեց. «Կյանք ա, էլի, ամեն ինչ կարա լինի, եթե ես ինձ լավ չպահեմ, ինձ էլ կարան դատեն»: Մնում է պարզել, թե ինչ է նշանակում «լավ չպահել»-ը:
