РИА Новости-ի փոխանցմամբ՝ Վրաստանում ԱՄՆ դեսպան Ռիչարդ Նորլանդն ու ամերիկացի սենատորներ Ջին Շաֆինն ու Ջեյմս Ռիշը հոկտեմբերի 1-ի խորհրդարանական ընտրություններում տարած հաղթանակի կապակցությամբ շնորհավորել են «Վրացական երազանք» դաշինքի առաջնորդ Բիձինա Իվանիշվիլիին: Այս մասին նշված է Իվանիշվիլիի Facebook-յան էջում:
Նշված է, որ հանդիպումը տեղի է ունեցել Բիձինա Իվանիշվիլիի բիզնես-կենտրոնում: Հանդիպման ավարտին հանրապետական սենատոր Ջեյմս Ռիշը հայտարարել է. «Երեկ պատմական օր էր վրաց ժողովրդի համար: Որոշակի փոփոխություններն արդեն իսկ տեսանելի են:
Մենք մանրամասն քննարկեցինք, թե որքան կարևոր են վրաց-ամերիկյան հարաբերությունները: Մենք անհամբերությամբ ենք սպասում ոչ միայն այդ հարաբերությունների շարունակմանը, այլև՝ դրանց խորացմանը: Մենք լավ ընկերներ ենք և ցանկանում ենք մնալ այդպիսին»:
Դեմոկրատ սենատոր Ջին Շաֆինը, իր հերթին ամփոփելով այդ հանդիպման արդյունքները, հույս է հայտնել, որ վրաց-ամերիկյան համագործակցությունը կշարունակվի. «Մենք կարծում ենք, որ երեկ կատարվել է շատ դրական քայլ դեպի առաջ, ընդ որում՝ թե՛ Վրաստանի, թե՛ ընդհանրապես ժողովրդավարության համար: Մենք հուսով ենք, որ համագործակցության տրամադրվածությունը կպահպանվի»:
Բիձինա Իվանիշվիլին իր հերթին շնորհակալություն է հայտնել ամերիկացի հյուրերին՝ «Վրացական երազանք»-ի և ընդհանրապես Վրաստանի հանդեպ ցուցաբերած ուշադրության համար: Հանդիպումից հետո Իվանիշվիլին հայտարարել է, որ հանդիպման ժամանակ իրենք զրուցել են ապագայի մասին, թե ինչպես զարգացնեն հարաբերություններն ԱՄՆ-ի հետ և ինչպես զարգացնեն ժողովրդավարությունը Վրաստանում»:
