Ռուսաստանն անհանգստացած է Թուրքիայի և Սիրիայի սահմանի վրա շարունակվող լարվածությամբ և կոչ է անում երկու երկրներին զսպվածություն ցուցաբերել: Այս մասին հայտարարել է Ռուսաստանի փոխարտգործնախարար Գենադի Գատիլովը՝ հավելելով, որ սահմանի վրա դիտավորյալ սադրանքների վտանգ կա:
«Սիրիական հակամարտությունը, ցավոք, դուրս է գալիս աշխարհագրական շրջանակներից՝ ապակայունացնելով իրավիճակը հարևան շրջաններում, առաջին հերթին՝ փախստականների գործոնի պատճառով»,- ասել է Գատիլովն Interfax-ին: Ինչպես հայտնի է, երկրները, ինչպիսիք են Հորդանանը, Թուրքիան, Իրաքը և Լիբանանը, սիրիացի փախստականներ ընդունելով՝ լրացուցիչ պարտավորություններ են ստանձնում: ՄԱԿ-ի գնահատականներով՝ Սիրիայում տիրող հումանիտար իրավիճակը լուրջ անհանգստւթյունների տեղիք է տալիս. անհապաղ օգնության կարիք ունի շուրջ 2.5 մլն մարդ:
«Մենք կարծում ենք, որ և՛ Սիրիայի, և՛ Թուրքիայի իշխանությունները պետք է այս իրավիճակում առավելագույն զսպվածություն ցուցաբերեն՝ հաշվի առնելով սիրիական ընդդիմության շարքերում արմատականների աճող թիվը, որոնք կարող են դիտավորյալ սահմանային կոնֆլիկտային իրավիճակներ սադրել»,- ասել է Գատիլովը՝ հավելելով, որ այդ թեման բարձրացվել է Նյու Յորքում ՄԱԿ-ի Գերագույն ասամբլեայի նիստին:
