Տնտեսական ակտիվության ինդեքսը (ՏԱԻ) նախորդ տարվա նույն եռամսյակի համեմատությամբ այս տարվա երրորդ եռամսյակում աճել է (102.9%)` պայմանավորված արդյունաբերության (104.4%) և ծառայությունների (110.2%) ոլորտի գնահատականներով: ԿԲ հասարակայնության հետ կապերի ծառայությունից «Առաջին լրատվական»-ին հայտնեցին, որ աճել են ՏԱԻ թե՛ փաստացի, թե՛ սպասման ենթաինդեքսները (համապատասխանաբար՝ 103.2% և 103.3%)՝ պայմանավորված բոլոր ոլորտներով՝ բացառությամբ շինարարության և առևտրի:
Գործարար միջավայրի ինդեքսը նախորդ տարվա նույն եռամսյակի համեմատությամբ աճել է` կազմելով 108.8%: Ըստ ԿԲ-ի՝ միջավայրը բարելավվել է բոլոր ոլորտներում՝ բացառությամբ ծառայությունների (89.1%): Աճել են ԳՄԻ միայն փաստացի ենթաինդեքսները (100.9% և 101.1%): Չնայած սպասման ենթաինդեքսը նախորդ տարվա նույն եռամսյակի համեմատությամբ նույնպես անկում է ապրել (98.7%), սակայն ավելի բարձր է, քան նախորդ եռամսյակի համեմատությամբ (88.4%):
Նախորդ եռամսյակի համեմատությամբ՝ ընթացիկ եռամսյակում գների աճի մակարդակը հատկապես զուսպ կլինի արդյունաբերության և ծառայությունների ոլորտներում: Այստեղ համապատասխանաբար 73% և 98%-ի մոտ գների փոփոխություն չի գրանցվել: Աշխատողների թվաքանակի աճ առավելապես դիտվել է արդյունաբերության և առևտրի ոլորտներում: Աշխատավարձի մակարդակի բարձրացում հատկապես նկատվում է արդյունաբերության ճյուղի կազմակերպությունների մոտ:
Հարցված կազմակերպությունների 26.5%-ը գալիք եռամսյակում պատրաստվում են ներդրումներ իրականացնել, իսկ ընթացիկում իրականացրել է հարցվածների ընդամենը 25.7%-ը: Վերջիններիս համար որպես հիմնական աղբյուր կրկին ծառայելու են տեղական բանկերից ստացված վարկերը:
Պահանջարկի նվազումը այս եռամսյակում նույնպես որպես առաջնային խոչընդոտ է հանդիսացել արդյունաբերության, շինարարության և ծառայությունների մատուցման ոլորտների կազմակերպությունների համար: Առևտրի ոլորտում կարևորվել են փոխարժեքը և վճարվող հարկերի և մաքատուրքերի մեծությունը:
