«Մանդատը վայր դնելու վերաբերյալ որևէ պայմանավորվածություն չի եղել, ուստի այդ հարցն անգամ չի էլ քննարկվել Ազատ դեմոկրատներ կուսակցության վարչության կողմից: Ավելին՝ մենք անգամ դեմ ենք եղել Րաֆֆի Հովհաննսիյանի հրաժարականին, համոզված լինելով, որ նրա խորհրդարանական գործունեությունը կնպաստի խմբակցության աշխատանքներին»,- Առաջին լրատվականի հետ զրույցում ասաց Ազատ դեմոկրատներ կուսակցության մամլո խոսնակ Անժելա Խաչատրյանը, անդրադառնալով Ժառանգության առաջնորդ Րաֆֆի Հովհաննիսյանի այն դիտարկմանը, թե «Ազատ դեմոկրատներ» կուսակցության նախագահ Խաչատուր Քոքոբելյանը խախտել է պայմանավորվածությունը և չի հրաժարվել իր մանդատից:
Խաչատրյանը նաև մանրամասնեց, որ դեռևս ընտրարշավի ժամանակ և հետընտրական շրջանում Ազատ դեմոկրատներն իրենց դիրքորոշումն այս հարցում հստակ արտահայտել են. «Երբ բարձրացվում էր հարցը, թե որ դեպքում «Ազատ դեմոկրատներ» կուսակցության ներկայացուցիչները կհրաժարվեն Ազգային Ժողովի աշխատանքներին մասնակցելուց, մենք միշտ նշել ենք, որ թե՛ բոյկոտի, թե՛ սկսած գործից հրաժարվելու քաղաքական գործելակերպը մեզ համար ընդունելի չեն»:
«Ազատ դեմոկրատներ» կուսակցության մամլո խոսնակը նաև հիշեցրեց, որ ընտրություններից հետո էլ երբ խոսք էր գնում «Ազատ դեմոկրատներ»-«ժառանգություն» միասնական համամասնական ցուցակում տեղաշարժեր կատարելու վերաբերյալ, «Ազատ դեմոկրատներ» կուսակցության վարչությունը որոշում է ընդունել, որ իրենց կուսակցության ներկայացուցիչների տեղերը որևէ փոփոխության կամ տեղաշարժի չեն կարող ենթարկվել. «Մեր այդ որոշմումը հրապարակվել է և դրան տեղյակ են հասարակության լայն շրջանակներ»:
