Սիրիայի նախագահ Բաշար Ալ-Ասադը առանցքային դեր է խաղացել Լիբիայի նախկին առաջնորդ Մուամար Քադաֆիին բռնելու գործում: Ինչպես բրիտանական ԶԼՄ-ներին հայտնել է Լիբիայի հետախուզության նախկին ղեկավարներից մեկը՝ Ռամի Ալ-Ուբեյդին, Սիրիայի կառավարությունը ֆրանսիական հատուկ ծառայություններին է տվել Քադաֆիի արբանյակային հեռախոսի համարը, որով հաջողվել է պարզել նրա գտնվելու վայրը:
Հեռախոսահամարը փոխանցվել է հենց այն պահին, երբ միջազգային հանրության ուշադրությանը Լիբիայում տիրող իրավիճակից թեքվում էր դեպի Սիրիա: «Դրա փոխարեն Բաշար Ալ-Ասադը ֆրանսիական կողմից խոստում է ստացել իրեն ժամանակ տալ և թեթևացնել քաղաքական ճնշումը վարչակարգի վրա, ինչը և տեղի է ունեցել»,- ասել է հետախույզը, որի խոսքերը մեջբերում է Interfax-ը:
Ալ-Ուբեյդիի խոսքերով՝ հենց Ֆրանսիան է կազմակերպել Մուամար Քադաֆիին բռնելու գործողությունը՝ «լիբիացի ապստամբներին ուղարկելով այն վայրը, որտեղ դարան էր արվել, որի ընթացքում էլ բռնել են նրա (Քադաֆիի.- 1in.am) շարասյունը»:
Հիշեցնենք. ավելի վաղ հաղորդվում էր, որ Մուամար Քադաֆին սպանվել ֆրանսիացի գործակալի կողմից, ամենայն հավանականությամբ, Ֆրանսիայի այն ժամանակվա նախագահ Նիկոլա Սարկոզիի գիտությամբ:
